ایران حکومتیگه باغلنگن اوچ کیشی بریتانیانینگ فرفورد حربی هوا قورلمه‌سیده‌گی امریکا حربی اوچاقلریگه هجوم اویوشتیریش ریجه‌سیده عیبلندی. امریکا فدرال مدعی‌لری نینگ ینگی دعوا نامه‌سیگه کۉره، عیبلنووچیلردن بیری اوشبو عملیاتنی امریکا زندانی ایچیدن یاشیرین پیام‌لر آرقیلی باشقریب تورگن.
سی‌ان‌ان و نیویارک پوست معلوماتلریگه کۉره، ایران-عراق ایکّی فقرالیگیگه اېگه بۉلگن محمد باقر سعد داوود السعدی ثور آییده تورکیه‌ده قولگه آلینیب، اوروپاده‌گی ۲۰ گه یقین ترورچیلیک هجوملری عیبلاوی بیلن امریکه‌گه تاپشیریلگن اېدی.
نیویارک جنوبی محکمه‌سیده ثبت اېتیلگن دعوا نامه‌گه اساساً، السعدی توتقونلیک پیتیده ایرانده جایلشگن محسن مهاجری و محمد الحسانی اسملیک ایکّی شیریکی همکارلیگیده فرفورد قورلمه‌سیده جایلشگن امریکا حربی اوچاقلریگه هجوم قیلیشنی ریجه‌لشتیرگن.
مدعی‌لر نینگ بلدیریشیچه، السعدی عراقده‌گی آنه‌سی و سنگلیسی بیلن قیلگن تېلفون سۉزله‌شوویده اۉز شیریکلری اوچون رمزلی بیلدیرولر یۉلله‌گن. اوشبو سۉزله‌شوو نینگ بیریده السعدی اۉتمیش ریجه‌لر لغو اېتیلگنمی دیب سۉره‌گنیده، سنگلیسی بو ایشلر بېکار قیلینمه‌گنینی ایتگن.
عین پیتده، الحسانی اگست آییده بریتانیاده‌گی شیریکلیریگه بویروغلر بېریب، فرفورد حربی مرکزاینی کوزه‌تیش و هجوم اوچون ترتیباتلر کوریش مقصدی بیلن اولرگه پول تۉله‌گنی انیقلنگن.
مدعی‌لر تامانیدن قید اېتیلیشیچه، السعدی قولگه آلینیشیدن آلدین سپاه پاسداران قدس بۉلیمی نینگ سابقی قومندانی قاسم سلیمانی همده ایران رهبریتی بیلن یقین مناسبتده بۉلگن.
منبع: سی‌ان‌ان و نیویارک پوست
🌐
