د فواید عامې وزارت اعلان کړی چې د سالنګ لویه لار نن (سه شنبه) له غرمې وروسته په ۲ بجو د مسافر وړونکو موټرو پر مخ پرانیستل شوه.
دا مهمه لاره چې کابل له شمالي ولایتونو سره نښلوي، تیره اونۍ د چهارشنبې په ورځ د سختې واورې او توپان له امله بنده شوې وه .
د دې لارې پرانیستل د هغو مسافرو لپاره ښه خبر دی چې په وروستیو ورځو کې له ستونزو سره مخ وو.
د لارې پاکولو ټیمونو شپه او ورځ کار وکړ ترڅو لاره پاکه او د تګ راتګ لپاره چمتو کړي، خو له چلوونکو غوښتل شوي چې له پوره احتیاط څخه کار واخلي .
د سالنګ بندیدل تل په بازارونو کې د خوراکي توکو او تیلو پر بیو اغیز کوي.
چارواکو له خلکو غوښتي چې په ژمي کې پر دې لاره د سفر پر مهال دې ژمني تجهیزات له ځان سره ولري او ترافیکي قوانین دې په جدي توګه مراعات کړي .
