د افغانستان پخواني ولسمشر حامد کرزي د عزیزي شرکت لخوا د ۸۴۵ میګاواټه لمریزې او حرارتي بریښنا د تولید پروژې پیل د هیواد لپاره یو مهم ګام وباله. نوموړي دا کار د خلکو لپاره یو ښه زیری یاد کړ او هیله یې وښوده چې دا ډول پروژې به اقتصادي بنسټونه پیاوړي کړي.
ښاغلي کرزي په هیواد کې دننه د پانګونې له کبله له میرویس عزیزي مننه وکړه او ټینګار یې وکړ چې دا ډول نوښتونه هیوادوالو ته د کار او پرمختګ زمینه برابروي. هغه له نورو سوداګرو هم وغوښتل چې د افغانستان د آبادۍ لپاره په کور دننه پانګونه وکړي.
دا پروژه چې په وروستیو کلونو کې د انرژۍ یوه لویه طرحه ګڼل کیږي، کولی شي د هیواد د انرژۍ د کمښت یوه برخه پوره کړي. د انرژۍ د زیربناوو پراختیا د افغانستان د اقتصادي ودې لپاره ډیره اړینه ده.
