د بریتانیا صدراعظم کییر سټارمر اعلان وکړ چې ټولنیزې رسنۍ باید هغه شخصي او محرم عکسونه چې د رضایت پرته خپاره شوي، په ۴۸ ساعتونو کې لرې کړي. دا نوی قانون د ښځو پر وړاندې د تاوتریخوالي د مخنیوي او د “ګروک” په څیر د مصنوعي ځیرکتیا (AI) د غلطې کارونې د مخنیوي لپاره جوړ شوی دی.
د نویو مقرراتو له مخې، قربانیان کولی شي شکایت نیغ په نیغه تخنیکي شرکتونو ته ورسوي، چې دا به په ټولو پلیټ فارمونو کې یو خبرداری رامنځته کړي. د دې قانون هدف دا دی چې قربانیان مجبور نشي بار بار یو عکس راپور کړي. همدارنګه، د انټرنیټ اداره کونکي هڅه کوي چې د ډیجیټل نښو په واسطه دا ډول عکسونه په اتوماتیک ډول وپیژني.
دا پریکړه وروسته له هغه وشوه چې د ایلون مسک د مصنوعي ځیرکتیا پروګرام “ګروک” د ښځو او ماشومانو د جعلي عکسونو جوړولو له امله له نیوکو سره مخ شو. د آنلاین خوندیتوب قانون له مخې، اوس د مصنوعي ځیرکتیا په واسطه د جعلي غیر اخلاقي عکسونو جوړول او خپرول جرم ګڼل کیږي.
بریتانیا: ټولنیزې رسنۍ باید په ۴۸ ساعتونو کې شخصي عکسونه لرې کړي
