بیرلشگن ملت لر تشکیلاتی نینگ کابلده گی نماینده لیگی، ۲۰۲۶ نچی ییل نینگ آخریگچه ایران و پاکستاندن قَیتیب کېلیشی کوتیلگن قریب ۲.۷ میلیون افغان مهاجرگه یاردم بېریش اوچون ۵۲۹ میلیون دالرلیک بیر جواب بیریش ریجه سینی یولگه قویگینینی اعلان قیلدی. بو ریجه اپریل آییدن دسمبرگچه بولگن مدتنی اۉز ایچیگه آله دی.
بیرلشگن ملت لر تشکیلاتی طالبان رسمی لریدن قَیتیب کیلگن لر و میزبان جمعیت لرنی کوپراق حمایت قیلیش لرینی سۉره گن. شونینگدېک، بو تشکیلات خلق ارا جمعیتدن افغانستان ده بشردوستانه فعالیت لر دوامی اوچون کېره کلی مالی منبع لرنی تامین ایتیشنی طلب قیلگن. بو طلب، مملکتده بشردوستانه احتیاج لرنینگ یوقاری سویه ده قالётگن بیر پیتده اېشیتیلدی.
یقین پیتلرده، افغانستان ده گی بیرلشگن ملت لر یاردم هیئتی (یوناما) نینگ سرپرستی جورجت گانیون، هرات ولایتی نینگ ایران دن کیلگن مهاجر لرنینگ کیریش یولی بولمیش اسلام قلعه چېگره سیدن کۉریب چیقدی. او بو سفری جریانیده قَیتیب کیلگن لر و میزبان جمعیت لرنی حمایت قیلیش دوامینی تاکیدلب، بیر قطار قَیتیب کیلگن عایله لر بیلن صحبت قیلدی.
خلق ارا اداره لرنینگ مسئول لری، مهاجر لرنینگ احتیاج لری فقط قَیتیب کېلیش نینگ بیرینچی کونلری بیلن چېکله نیب قالمسلگینی ایته دیلر. اولر اۉز اصلی منطقه لریگه ییتیب بارگن دن سۉنگ، باش پناه، تعلیم، ساغلیکنی سقلش خدمت لری و ایش فرصت لریگه احتیاج سېزه دیلر که بو وضعیت محلی چېک لنگن منبع لرگه قۉشیمچه باسیم کیلتیره دی.
بو احتیاج لرنی برطرف ایتیش اوچون، بعضی قَیتیب کیلگن لر اوچون انگلیسی تیلی، کمپیوتر مهارت لری و کسبی تعلیم کبی تعلیمی برنامه لر تامین ایتیلگن. شونده ی بولسه ده، قیینچیلیک لر هلی هم کتته. اسلام قلعه ده گی بیرلشگن ملت لر تشکیلاتی نینگ ایشچی لری کوپچیلیک قَیتیب کیلگن عایله لرنینگ آغیر اقتصادی و اجتماعی قیینچیلیک لرگه دوچار بولگن لرینی ایته دیلر.
باشقه بیر خواطرلی تحولده، بیرلشگن ملت لر تشکیلاتی نینگ قاچقین لر بوییچه عالی کمیسارلیگی یقین پیتلرده هر بیر قَیتیب کیلگن شخص گه بېریله دیگن نقد پول یاردمی نینگ ۳۷۵ دالردن ۱۷۰ دالرگه کمه یتیریلگنینی اعلان قیلدی. بو کمه یتیریش قَیتیب کیلگن عایله لرنینگ اقتصادی قیینچیلیک لرینی کوچه یتیریشی ممکن.
منبع: زرین تی وی
🌐
