دونالد ترامپ حکومتی امریکا نینگ ۲۰۲۷ مالی ییلی اوچون قاچقینلرنی قبول قیلیش چیکلاوینی ۱۷ مینگ و ۵۰۰ کیشی ایتیب بېلگیله دی، لیکن بو برنامه ده افغانلر اوچون معین بیر حصه کۉزده توتیلمه گن. بو قرار افغان قاچقینلرنی قۉللب قوتلاوچی تشکیلاتلر آره سیده خواطرلر توغدیرگن.
نشر ایتیلگن رسمی حجت اساسیده، بو ظرفیت دایره سیده قبول قیلیش، کېلیشلری بشردوستانه سببلر یاکه امریکا نینگ ملی منفعتلریگه ماس بۉلگن کیشیلر اوچون روا کۉریلگن. شونده ی بۉلسه ده، بو حجتده افغانلر یاکه اولر اوچون علیحده بیر حصه اجره تیلیشی حقیده هېچ قنده ی اشاره بېریلمه گن و ظرفیت نینگ اساسی قسمی «جنوبی افریقا نینگ افریقانرلری» گه اجره تیلگن.
بو موضوعگه عکس العملده، امریکا ده افغان قاچقینلرنی حمایت قیلوвчи افغان ایواک تشکیلاتینی معلوم قیلیشیچه، بو قرار امریکا نینگ افغانستانده گی حضوری جریانیده او مملکت نینگ حربی کوچلری، دیپلماتلری و توسعه برنامهلری بیلن همکارلیک قیلگن افغانلرنی اعتبارگه آلمه گن. بو تشکیلات تاکیدله شیچه، اوشبو همکارلر ینگی حصه دن چیقاریلگنلر.
افغان ایواک رئیسی شان وندایور نینگ ایتیشیچه، ینگی قرار امریکا نینگ افغان همکارلرینی ۲۰۲۷ نچی ییل قاچقینلرنی قبول قیلیش برنامه سیدن محروم قیلگن. بو تشکیلاتگه کۉره، افغان قاچقینلر دوسیه لرینی کۉریب چیقیش جریانی هلی هم تۉخته تیلگن و دوسیه لری امریکا نینگ افغانلرگه بېرگن وعده لریگه باغلیق بۉلگن ۲۵۰ مینگدن آرتیق کیشی نینگ سرنوشتی هلی هم نامعلوم قالماقده.
افغان ایواک بوندن آلدین امریکا حکومتیدن ۲۰۲۷ مالی ییلیده حداقل بیش مینگ و ۲۰۲۸ نچی ییلده ینه بیش مینگ حصه نی افغان قاچقینلرگه اجره تیشنی سۉره گن اېدی. بو تشکیلات سونگگی قرارگه قره مه ی، امریکا نینگ افغان همکارلرینی انتقال بیریش و قبول قیلیش یۉلینی قیته آچیش اوچون اۉز سعی و حرکتلرینی دوام اېتتیریشینی ایتگن.
امریکا جمهور رئیسلیگی نینگ حجتی شونینگدېک، قاچقینلرنی قبول قیلیش ترامپ حکومتی نینگ سخت سیاستلری، جمله دن کیملیکنی دقیق تېکشیریش و قاچقینلرنینگ عمومی کیریشینی تۉخته تگن فرمانگه باغلیق ایکن لیگینی هم تصریحله یدی.
اېسله تیب اۉتیش جایزکه، ترامپ حکومتی ۲۰۲۶ مالی ییلی اوچون هم دستلب قاچقینلرنی قبول قیلیش چیکلاوینی یېتّی مینگ و ۵۰۰ کیشی ایتیب بېلگیله گن اېدی، لیکن کېینچه لیک بو چیکلاونی ۱۷ مینگ و ۵۰۰ کیشیگه کۉترگن اېدی. مهاجرت حقوقی فعاللری کېله جک ییل جریانیده افغانلرگه نسبتاً سیاست نینگ اۉزگریشی ممکن لیگیدن امیدوارلر.
منبع: افغان‌ایواک
🌐
