طالبانگه قرشی قوراللی گروهلردن بیری بۉلگن افغانستان متحد جبهه‌سی، قندهار ولایتیده گی بیر عملیاتده اوشبو گروه نینگ بیر پولیس اعضاسینی اۉلدیرگنینی ادعا قیلدی. بو جبهه نینگ ایتیشیچه، هجوم جمعه کونی، ۱۰ میزان ده، ارغنداب ولسوالی سی نینگ «سربند» منطقه‌سیده عملگه آشیریلگن.
اوشبو جبهه ایکس اجتماعی ترماغیده بیر خبرنامه و ویدیو نشر قیلیب، اۉز ادعاسینی اورته گه قۉیگن. لېکن، نشر قیلینگن ویدیوده هجوم یا-ده اۉلدیریلگن کیشی نینگ جسدی کۉرینمه‌یدی و حادثه نینگ قنده‌ی یوز بېرگنی حقیده کۉپراق تفصیلات بېریلمه‌گن.
طالبان حکومتی نینگ رسمی‌لری حاضرگچه افغانستان متحد جبهه‌سی نینگ بو ادعاسی حقیده هیچ قنده‌ی فکر بیلدیرمه‌گن. بو جبهه آلدین هم اۉز هجوملریدن ویدیولر نشر قیلگن اېدی که اولرنینگ بعضی لریده طالبان اعضالری نینگ جسدلری کۉرینگن.
افغانستان سابق اردوسی قوماندانلریدن سمیع سادات رهبرلیگیده گی متحد جبهه، طالبانگه قرشی کینگ حربی فعالیتلرنی اویوشتیرگنینی ادعا قیله‌دی. بو جبهه نینگ ادعاسیگه کۉره، اونینگ کوچلری سۉنگگی ایککی آی جریانیده مملکت نینگ ۱۹ ولایتیده ۶۸ عملیات اۉتکزگن.
بو جبهه شونینگدېک بو عملیاتلر نتیجه‌سیده ۱۰۲ طالب اعضاسی اۉلدیریلیب و باشقه ۴۵ اعضاسی یره لنگنینی ادعا قیله‌دی. جبهه تامانیدن ادعا قیلینگن هجوملرنینگ کۉپینچه‌سی افغانستان نینگ جنوبی ولایتلری، خصوصاً قندهار و هلمندده یوز بېرگن.
افغانستان متحد جبهه‌سی جاری ییل نینگ آگست آیی نینگ بیرینچی کونیده افغانستانده «طالبان و باشقه تروریستی گروهلرگه» قرشی اۉз حربی عملیاتلرینی باشله‌گنینی اعلان قیلگن اېدی.
منبع: افغانستان متحد جبهه‌سی نینگ اعلامیه‌سی
🌐
