پاکستان تشقی ایشلر وزیرلیگی شنبه کونی، ۱۱ میزان ده، هند چېگره کوچلری تامانیدن ایککی پاکستانلیک تینچ اهالی نینگ اۉلدیریلیشیگه اعتراض قیلیب، اوشبو مملکت نینگ اسلام آبادده گی ایلچی خانه سی نینگ ایشلر وکیلینی چقیردی. بو حادثه پنجاب ایالتی نینگ بیر چېگره منطقه سیده یوز بېرگن.
پاکستان تشقی ایشلر وزیرلیگی بیانیه سیگه کۉره، بو حادثه جمعه کونی، ۱۰ میزان ده، کاسور یقینیده گی بیدیان منطقه سیده یوز بېرگن. بیانیه ده ایتیلیشیچه، هند چېگره کوچلری «هیچ قنده‌ی تحریکسیز» اوچ نفر قورالسیز تینچ اهالیگه قره ته اوق اوزگن که، بو حرکت «بوتونله‌ی ناموجه و جوده نامتناسب» دیب توصیفلنگن.
اسلام آباد بو کیشیلرنینگ هند توپراغیگه نفوذ قیلیشی ممکن لیگی حقیده گی هر قنده‌ی ادعانی رد ایتیب، قربانلر «نفوذی» دیب اتلمسلیگی کیره کلیگینی تأکیدله‌گن. بو اوق اوزیشده عزمت رسول و محسن جت هلاک بۉلیب و باشقه بیر کیشی یره لنگن.
پاکستان هنددن بو باره ده «عاجل، شفاف و ایشانچلی تیکشیروو» اوتکزیب و نتیجه سینی پاکستانگه بیلدیریشنی سۉره گن. اسلام آباد شونینگدیک بو حادثه مسئوللریگه قرشی قانونی چاره کۉریلیشینی هم طلب قیلگن.
لیکن، بو واقعه حقیده هند نینگ روایتی فرقلی دیر. هند رسانه لری و آسوشیتدپرس، بو حادثه نینگ قنده‌ی یوز بېرگنی حقیده تورلی روایتلر موجودلیگینی گزارش بېرگن و بعضی هند منبعلری بو کیشیلر هند توپراغیگه کیریشگه حرکت قیلیش گمانیده بۉلگنلرینی ایتگنلر.
بو حادثه ایککی هسته ای مملکت اۉرته سیده گی کېسکینلیکلرنینگ آرتگن بیر پیتده یوز بېرگن. بیر کون آلدین، پاکستان اردوسی نینگ سۉزچیسی هند نینگ لشکر طیبه نینگ بیر یوکسک مرتبه لی قوماندانی نی اۉلдирگنلیگی حقیده گی ادعاسینی رد ایتیب و هر قنده‌ی هجوم صورتیده «جوده قتّیق» جواب قییتریشلری حقیده آگاهلنتیرگن اېدی.
منبع: رسانه ای گزارشلر
🌐
