هراتده گی «گرین انرژی پلس» شرکتی دوشنبه کونی، ۱۳ میزان ده، اوز تولیدی باطری لری نینگ ایکّی میلیون دالرلیک تورتینچی صادراتی یوکینی بیرلشگن عرب امیرلیکلریگه صادر قیلدی. بو اقدام، افغانستان نینگ صنعتی و منطقه وی بازارلرگه صادراتینی کوچه‌یتیریش اوچون مهم بیر قدم حسابلنه‌دی.
بو شرکت نینگ رئیسی عبدالمتین قلندری، بو یوک نینگ ایچکی تولیدات نینگ یوقاری کیفیتی نی کورسته یاتگنی نی معلوم قیلدی. او، بو باطری لرنینگ بیر ییللیک ضمانت بیلن عرب بازارلریگه عرضه قیلینیشی نی و بو شرکت نینگ ایچکی احتیاج نی تامین لش یانیده، تشقی بازارلرده اوز حضوری نی کینگه‌یتیریشگه حرکت قیله یاتگنی نی تاکیدله‌دی.
جناب قلندری نینگ ایتیشیچه، صنعتی صادرات نی کوچه‌یتیریش افغانستان ده گی فابریکه لرنینگ جانللیگیگه یاردم بیریب، یاشلر اوچون ینги ایش اورینلری یره تیشی ممکن. «گرین انرژی پلس» فابریکه‌سی نینگ اوزی تقریباً ۵۵۰ کیشی گه توغریدن توغری ایش زمینه سی یره‌تگن و کونده تورت مینگ باطری ایشلب چیقره‌دی.
شونینگدیک، هرات سرمایه یاتقیزیش اتاغی نینگ رئیسی عبدالمتین امین هم بو باطری لرنینگ کیفیتی نی تاییدلب، افغانستان تولیداتی نینگ فارس قولتوی بازارلریده گی خریدارلرنینگ نیازلرینی قاندیره آلگنینی ایتدی.
بو، شرکت نینگ تورتینچی صادراتی یوکی دیر. بوندن آلدین، اوتگن ییل قوس آییده، ۴۰ مینگ دالردن آرتیق ارزش گه ایگه ۱۰ کانټینر باطری دن عبارت بیرینچی یوک، بیرلشگن عرب امیرلیکلری و سعودی عربستان گه صادر قیلینگن ایدی. صادرات ارزشی نینگ آشیشی بو صنعت نینگ رواجلنگنینی کورسته‌دی.
کان لر و صناعت لر اتاغی نینگ گزارش لریگه کوره، حاضرگی پیتده افغانستان ده کمیده ۱۳ باطری ایشلب چیقرووچی فابریکه فعال بولیب، اولرنینگ بیشته سی هرات صنعتی شهرچه‌سیده جایلشگن. بو فابریکه‌لر ایچکی بازار احتیاجی نینگ تقریباً ۸۰ درصدی نی تامینله‌یدی. بو صادرات شوندهی بیر شرایطده عملگه آشیریلماقده که، ایچکی تولیدچی لر بانکی و ترانزیتی قیینچیلیک لر بیلن روپه‌رو، لیکن شونده هم افغانستان صنعتی محصول لرینی منطقه وی بازارلرگه کیریتیش اوچون سعی و حرکت قیلماقده لر.
منبع: محلی گزارش لر
🌐
