یوقالیب کیتگن افغان-آمریکالیک تبعه محمود شاه حبیبی نینگ آغه سی احمد شاه حبیبی، آمو تلویزیونیگه بیر پیام یوباریب، طالبان حکومتیدن آغه سینی قوییب یوباریشینی ینه بیر بار سوره‌دی. او، افغانستانده قولگه آلینگن آمریکالیک تبعه لرنینگ تقدیرلری، طالبان و آمریکا قوشمه ایالتلری اورته سیده گی مناسبتلرده بیر اساسی موضوع بولیب قالگنینی تاکیدله‌دی.
جناب حبیبی، آغه سی نینگ هلی هم طالبان نظارتی آستیده ایکنینی و آمریکا قوشمه ایالتلری حکومتی اونینگ آزادلیگینی تامینلش و عایله سیگه قیتیب کېلتیریش اوچون سعی و حرکتلرینی دوام اېتّیریاتگینی ایتدی. بو بیانلر، حبیبی عایله سی نینگ تۉرت ییلدن آرتیق واقتدن بېری اونینگ قیتیب کېلیشینی کوتیب تورگن بیر پیتده بیان ایتیلماقده.
احمد شاه حبیبی قۉشیمچه قیلدی: «طالبان آمریکا قوشمه ایالتلری بیلن نورمال مناسبتگه اېگه بۉلیش اوچون قیزیقیش بیلدیرگن، حال بوکه آمریکا حکومتی هلی هم قولگه آلینگن آمریکالیک تبعه لر موضوعسینی اورته گه قویماقده.» او طالبانگه خطاباً ایتدی: «مېنینگ طالبانگه پیامیم ساده: آمریکالیک تبعه لرنی اسیرلیکدن آزاد قیلیش، سیزنینگ آمریکا حکومتی بیلن مناسبتلرینگیزنینگ کلیدی دیر. بو بیر مهم بشردوستانه اقدام و ایشانچ قازانیش، مناسبتلرنی یخشی لش و ایکی تامان اورته سیده سازنده تعامل اوچون بیر یول یره تیش یولیده معنالی بیر قدم بۉله‌دی.»
احمد شاه حبیبی نینگ سۉزلریگه کۉره، آمریکا قوشمه ایالتلری حکومتی اولرنینگ عایله سیگه ایشانچ بیرگن که، طالبان بیلن مناسبتلرنی نورماللشتیریش، اونینگ آغه سی داخل بۉلگن آمریکالیک تبعه لر آزاد ایتیلمگونچه آلغه کیتمه‌یدی.
شو بیلن بیرگه، طالبان حکومتی کۉپ مرته محمود شاه حبیبی نی قولده سقلب تورگنینی رد اېتگن. بیانلرده گی بو تضاد، حبیبی عایله سی اوچون وضعیتنی بوندن هم قیینلشتیرگن.
آمریکالیک تبعه و افغانستان نینگ سابق ملکی هوانوردلیک اداره سی رئیسی محمود شاه حبیبی، ۲۰۲۲ نچی ییل نینگ ۱۰ نچی اگست کونی کابلده یوقالیب قالگن. او اوشه پیتده کابلده جایلشگن آسیا مشورتی گروهی اوچون مشاور صفتیده ایشله‌یاتگن اېدی.
آمریکا فدرال تیکشیرو اداره سی (اف بی‌آی) اعلان قیلگن که، طالبان حکومتی نینگ استخبارات عمومی ریاستی، حبیبی و اونینگ حیداوچیسینی موتردن توشیریب، اولرنی بو شرکت نینگ باشقه ۲۹ ایشچیسی بیلن بیرگه قولگه آلگن. اف بی‌آی گه کۉره، اوشه واقتدن بېری حبیبیدن هیچ قنده‌ی خبر یوق.
اگست آییده، حبیبی نینگ یوقالیب قالگنی نینگ تۉرتینچی ییل لیگیده، اف بی‌آی ینه بیر بار اونینگ قه ییرده ایکنلیگی حقیده معلومات سوره ب، اونی اویگه قیتیب کېلتیریشگه متعهد ایکنینی بیلدیردی. اف بی‌آی شونینگدیک حبیبی نینگ قیزی بیر یاشرلیگیدن آلدین آته سینی کورمگینی هم اېسلتدی. آمریکا تشقی ایشلر وزیرلیگی نینگ «عدالت اوچون مکافات» برنامه‌سی، حبیبی نینگ تاپیلیشی، قوتقریلیشی و قیتیب کېلتیریلیشیگه سبب بۉله‌دیگن معلومات اوچون ۵ میلیون دالرگه چه مکافات تعیینله‌گن.
منبع: Amu TV
🌐
