فرانسه خبر آژانسی بیر دیپلوماتیک منبع دن نقل قیلیب خبر بېریشیچه، فرانسه جرمی سابقه سی بولگن افغان مهاجرلرنی چیقاریش اوچون طالبان بیلن تکنیکی مذاکره لرنی باشله‌گن. بو منبع چهارشنبه کونی، ۱۵ میزان ده، ایتگنکه، پاریس بو اقدامنی مملکت نینگ «امنیتی نی تضمین ایتیش» اوچون ضروری دیب بیله دی.
بو دیپلوماتیک منبع قۉشیمچه قیلدی: «فرانسه هم باشقه اروپایی مملکتلر کبی، قانونی اقامتی بولمه‌گن و عمومی نظم اوچون تهدید دیب حسابله یدیگن افغان پناهجولرینی تۉغریدن-تۉغری افغانستانگه قیتره آلیش اوچون طالبان بیلن تکنیکی صحبتلرنی باشله‌گن.» او چیقاریلیشی ممکن بولگن کیشیلرنینگ دقیق سانی حقیده جزئیات بېرگن ایمس، لیکن فرانسه رسانه لری «یوزلرچه» کیشی نینگ چیقاریلیش احتمالی دن خبر بېرگنلر.
بو اقدام شونده‌ی بیر حالده یوز بېرماقده که، فرانسه ۱۴۰۰ نچی ییل اسد آییده طالبان نینگ قدرت گه قیتیب کیلگنیدن بویان، بو گروه بیلن هیچ قنده‌ی دیپلوماتیک علاقه لرگه اېگه ایمس و کابلده گی اۉز سفارتینی یاپیق سقلگن. فرانسه تشقی ایشلر وزیرلیگی هم هلی گچه بو صحبتلرنینگ رسمی باشلنگنینی تصدیقله‌گن ایمس.
فرانسه آلمان، بلجیم و سویدن دن سۉنگ، افغان مهاجرلرنی قییتریب بېریش اوچون طالبان بیلن مذاکره گه کیرگن اروپا اتفاقی نینگ تۉرتینچی مملکتی دیر. بو صحبتلر، مهاجرلرنینگ حضورینی جرم و جنایتلرنینگ آرتيش عاملی دیب بیله دیگن، اروپا ده گی مهاجرت گه قرشی اۉنگ قانات حزبلر نینگ نفوذی آرتيش بیلن شدتله نگن.
اروپالی مقام لر تأکیدله‌گنلر که بو تکنیکی صحبتلر طالبان حکومتینی رسمًا تانیش یاکه حمایت قیلیش معناسینی بیرمیدی. بیراق، طالبان بو فرصتدن اۉز دیپلوماتیک علاقه لرینی کینگه‌یتیریش اوچون فایده لنیب و آلمان کبی مملکتلرگه دیپلوماتلر یوبارگن.
طالبان نینگ بیر بېش کیشی لیک هیئتی جاری ییل نینگ سرطان آییده افغان مهاجرلرنی قییتریب بېریش حقیده صحبت قیلیش اوچون بروکسل گه سفر قیلیب و بو ساحه ده اروپا اتفاقی نینگ ییغیلیشیده قتنه شگن اېدی. بو جریان بشر حقوقی فعاللری آره سیده چیقاریلگن پناهجولرنینگ امنیتی حقیده تشویشلرنی وجودگه کیلتیرگن.
منبع: فرانسه خبر آژانسی
🌐
