بلخ والیسی محمد یوسف وفا، پنجشنبه کونی کابلده ترکیه ایلچیسی سادین ایلدز بیلن اوچره شیب، ایکّی تامان بلخ ولایتی و ترکیه اۉرته سیده اقتصادی، تجارتی و ترانزیتی علاقه لرنی کېنگه یتیریش حقیده سۉزلشدیلر.
بلخ والیسی نینگ سۉزلاوچیسی حاجی زید نینگ ایتیشیچه، اوشبو اوچره شوو اۉز ارا همکارلیکنی مستحکملش مقصدی بیلن اۉتکزیلگن. اونینگ سۉزلریگه کۉره، والی وفا ایکّی مملکت اۉرته سیده گی تاریخی و مدنی علاقه لرنینگ اهمیتیگه تاکیدلب، بلخده ترکیه سرمایه یاتقیزیشلری نینگ آشیریلیشینی سۉره گن.
والی سۉزلاوچیسی نینگ معلوماتیگه اساساً، ایکّی تامان شونینگدېک ترکیه ده بلخ لیک تجارتچیلرگه قولیلیکلر یره تیش و ترکیه گه سفر قیلیشنی ایسته‌گن افغان سوداگرلری و مریض لر اوچون ویزه بېریش جریانینی ساده لشتیریش باره سیده هم فکر المشگنلر.
ترکیه ایلچیسی جناب ایلدز، اۉز مملکتی نینگ افغانستان، خصوصاً مهم بیر تجارتی و ترانزیتی مرکز بۉلگن بلخ ولایتی بیلن علاقه لرنی کېنگه یتیریشگه قیزیقیشینی بیلدیردی. او مطرح ایتیلگن تکلیف لرنی اۉز مملکتی رسمی لری بیلن اۉرته گه ق️ییشگه وعده بېردی.
بلخ ولایتی، استراتیژیک موقعیتی و حیرتان تجارتی بندری سببلی افغانستان نینگ اقتصادی قطب لریدن بیری سنله دی و اونینگ ترکیه بیلن تجارتی علاقه لرینی توسعه سی منطقه اقتصادی اۉسیشیگه یاردم بېریشی ممکن.
منبع: حاجی زید، بلخ والیسی نینگ سۉزلاوچیسی
🌐
