طالبان کنترولی آستیده گی برشنا شرکتی و ایران نینگ «توانیر» شرکتی نینگ نماینده لری انرژی و برق ساحه سیده بېش ییللیک همکارلیک کېلیشووی نی نهایی قیلیش اوچون سۉزلشدیلر.
طالبان کنترولی آستیده گی باختر خبر آژانسی، پنجشنبه کونی، ۱۶ میزانده، کېلیشوو متنی نینگ محتواسینی تیکشیریش، تخنیکی بهالنتیریش و برق ساحه سیده مشترک همکارلیکلرنی نهایی قیلیش مقصدی بیلن بیر تخنیکی ییغیلیش اۉتکزیلگنینی خبر بېرگن.
گزارشگه کۉره، بو ییغیلیشده ایکّی تامان افغانستان نینگ برق سکتوریده تخنیکی مطالعه لرنی یکونلش و سرمایه یاتقیزیش باره سیده بحث و فکر المشگنلر. افغانستان اۉز ضرورتی بۉلگن برق نی تامینلش اوچون قۉنشی مملکت لر، جمله دن ایران دن کېلتوریله دیگن برققه قتیق باغلیق دیر.
کېلیشوو نینگ باشقه مهم نقطه لری افغانستان ایچیده برق تجهیزاتلرینی ایشلب چیقریش و تخنیکی ساحه لرده همده برشنا شرکتی ایشلاوچی لری نینگ ظرفیتینی یوقاری کۉتریشده مشترک همکارلیکلرنی اۉز ایچیگه آله دی.
خبرگه بناً، همکارلیک کېلیشووی و بېش ییللیک برق ساتیب آلیش قراردادی نینگ نهایی متنی یقین کېله جکده ایکّی تامان اۉرته سیده امضالنیشی کوتیلماقده. بو قرارداد نینگ امضالنیشی، افغانستان نینگ کېله جک بېش ییل اوچون انرژی خوفسیزلیگینی بیر مقدار تامینله شی ممکن.
منبع: باختر خبر آژانسی
🌐
