افغانستان نینگ حادثه لرگه قرشی کوره شیشگه تیارگرلیک اداره سی خلق ارا نهاد لرنینگ معلوماتیگه اساسلنیب، مملکت نینگ میزان آیی نینگ ۱۷ سیندن ۲۲ سیگچه بولگن هوا وضعیتینی پیش بینی قیلدی. بو پیش بینی مملکت نینگ تورلی منطقه لریده قورغاقچیلیک، یاغینچیلیک، سیلاب و حرارت درجه سی وضعیتینی اۉز ایچیگه آلگن.
بو گزارش گه کۉره، سونگگی یاغین لر سببلی شرقی و شمال شرقی منطقه لرده گی عادی بولمه گن قورغاقچیلیک وضعیتی یخشی لنگن. شونگه قره می، مملکت نینگ جنوبی و غربی منطقه لریده قورغاق شرایط حاکم بولیب قاله دی. بو وضعیت اوشبو منطقه لرده گی ایکینچیلیک و سوو منبع لریگه سلبی تاثیر قیلیشی ممکن.
یاغینچیلیک بۉییچه، شرقی و شمال شرقی منطقه لرده ۵ دن ۲۵ ملی مترگچه یاغین یاغیشی کۉزده توتیلگن. بو یاغین لر، خصوصاً یاغین نینگ دواملی یاکه کوچلی بولیشی حالتیگه، ناگهانی سیلاب لر خطرینی یېتکزه آله دی. شونینگدېک، مرکزی یوکسک لیکلرده یینگیل یاغین و بلندراق جای لرده قار یاغیشی احتمالی هم موجود.
حرارت درجه سی بۉییچه، مملکت نینگ کۉپچیلیک منطقه لریده هوا درجه سی عادی حددن ۱ دن ۴ درجه گچه یوقاری بولیشی انتظار قیلینه دی. خصوصاً، نیمروز ولایتیده حرارت درجه سی ۳۵ درجه دن آشیب کېتیشی ممکن که بو اهالی اوچون قیین شرایط یره ته آله دی.
عکسینچه، شمال شرقی تاغلیک منطقه لر و مرکزی یوکسک لیکلرده کېچه لری هوا درجه سی صفر درجه دن پسگه توشیشی ممکن. هوا درجه سی نینگ بو کبی کېسکین اۉزگریشی ایکینچیلیک و خلق ساغلیگی اوچون قیین چیلیک لر توغدیریشی ممکن.
حادثه لرگه قرشی کوره شیشگه تیارگرلیک اداره سی وطنداش لردن، خصوصاً ضرر کۉره دیگن منطقه لرده، سیلاب و هوا درجه سی نینگ کېسکین اۉزگریشی کبی احتمالی خطر لرگه قرشی لازم تیارگرلیک نی کۉریشنی و خوفسیزلیک توصیه لریگه اعتبار بېریشنی سۉره گن.
منبع: حادثه لرگه قرشی کوره شیشگه تیارگرلیک اداره سی
🌐
