پاکستان تشقی ایشلر وزیرلیگی، طالبان حکومتی نینگ تشقی ایشلر وزیرلیگی سرپرستی امیرخان متقی نینگ اسلام آباد نینگ داعش خراسان شعبه سی بیلن علاقه سی بارلیگی حقیده گی ادعا لرینی جدی روشده رد ایتدی. بو لفظی کېسکین لیک ایککی مملکت نینگ چېگره خوفسیزلیگی و تروریزم گه قرشی کوره ش بۉییچه دوام اېتیب کیله یاتگن اختلاف لری نینگ دوامی دیر.
پاکستان تشقی ایشلر وزیرلیگی نینگ سۉزچیسی ساجد حیدرخان، جمعه کونی بیر خبر ییغیلیشیده، «اسلام آباد داعش خراسان بیلن علاقه سی بارلیگی حقیده گی ادعانی رد اېته دی و بدخشان و نورستان ده گی وضعیت مسؤلیتی طالبان نینگ ذمه سیده دیر» دېب ایتدی. او ینه بیر بار پاکستان تحریک طالبانی و باشقه قوراللی گروه لرنینگ افغانستانده، خصوصاً کابلده، تینچ پناهگاه لری بارلیگینی ادعا قیلدی.
بو بیانات لر امیرخان متقی نینگ «مسکو فارمتی» ییغیلیشیده بعضی مملکت لرنینگ داعش بیلن علاقه لریگه اشاره قیلگنیدن سۉنگ بیریلدی. پاکستان تشقی ایشلر وزیرلیگی سۉزچیسی شونینگدېک مسکو ییغیلیشی نینگ مشترک بیر اعلامیه سیز یکونلنگنی حقیده، طالبان هیئتی نینگ اوتگن ییل لرنینگ اعلامیه متنی بیلن موافقت قیلمه گنینی و آلدینگی موضع سیدن اوزاقلشگنینی ایتدی.
حیدرخان نینگ سۉزلریگه کۉره، بو اختلاف «فقط سۉزلر اوستیده گی بیر اختلاف اېمس، بلکه بیر اساسی مسئله اېدی.» لیکن، او بو حقده کۉپراق تفصیلات بېرمه دی. روسیه رسمیلری هم آلدینراق اعلامیه چیقریلمه گنی نینگ سببی نی طالبان و پاکستان هیئت لری اۉرته سیده گی فکر فرقی دېب ایتگن اېدیلر.
پاکستان شونینگدېک، افغانستانده گی ترورچی گروه لرنینگ دقیق جای لرینی «علاقه دار تامان لرگه» بیلدیرگنینی و افغانستان توپراغیگه قیلگن سونگگی هجوم لری نینگ معین هدف لرگه و دقیق روشده عملگه آشیریلگنینی ادعا قیلدی.
طالبان حکومتی هر دایم پاکستان نینگ افغانستانده ترورچی لرنینگ تینچ پناهگاه لری موجودلیگی حقیده گی ادعا لرینی رد قیلیب، اسلام آبادنی اۉز چېگره لرینی کنترول قیلیشگه قادر اېمس لیکده عیبله ب کیلگن.
منبع: رسانه لر
🌐
