امریکا قوشمه ایالتلری نینگ جمهور رئیسی دونالد ترامپ اداره سی، خلق آرا جنایی محکمه (ICC) گه قرشی تحریم لرنی وضع قیلدی. بو اقدام، اوشبو محکمه نینگ جدی عکس العملی گه دوچ کیلدی و محکمه اونی «قانون حاکمیتی و خلق آرا حقوقی نظام گه هجوم» دېب اتدی.
رویترز خبر آژانسی نینگ معلوماتیگه کۉره، خلق آرا جنایی محکمه سی اۉزی نینگ ۱۲۵ اعضا مملکتی دن امریکا نینگ بو تحریم لریگه قرشی اوشبو قضایی نهاد نینگ مستقل لیگی نی حمایه قیلیش لرینی سۉره‌گن. بو تحریم لر واشنگتن نینگ محکمه گه قرشی آلدینگی باسیم لری نینگ دوامی صفتیده عملگه آشیریلماقده. امریکا بوندن آلدین هم اوشبو محکمه نینگ بیر قطار قاضی لری و څارنوال لریگه قرشی تحریم لر وضع قیلگن اېدی.
بو کېسکینلیک لر، خصوصاً، خلق آرا جنایی محکمه سی افغانستانده امریکالیک کوچلر تامانیدن احتمالی اوروش جنایت لری بۉییچه تیکشیروو لرنی باشله گنیدن سۉنگ کوچه‌یدی. بوندن تشقری، اوشبو محکمه نینگ فلسطین ییرلریده گی اقداملری سببلی اسرائیل مقام لری اوچون قولگه آلیش حکمی نی چیقریش بۉییچه سعی و حرکت لری هم واشنگتن نینگ غضبینی قۉزغتدی.
امریکا حکومتی خلق آرا جنایی محکمه سی نینگ اعضاسی اېمس و اۉز تبعه لریگه نسبتاً تیکشیروو اوچون اونینگ صلاحیتی نی تن آلمه‌یدی. امریکالیک مقام لرنینگ استدلال قیلیشیچه، بو محکمه امریکا نینگ ملی حاکمیتی نی بوزه‌دی و امریکا نینگ اۉز قضایی سیستمی بونده‌ی جنایت لرنی تیکشیریش اوچون ییترلی دیر.
اونینگ قرشیسیده، ۲۰۰۲ نچی ییلده تاسیس ایتیلگن خلق آرا جنایی محکمه سی، ملی دولت لر اونی عملگه آشیریش گه قادر بۉلمه‌گن یاکه ایسته مه‌گن حالده، نسل کشی لیک، اوروش جنایت لری و بشریت گه قرشی جنایت لر عامل لرینی محکمه قیلیش اوچون سونگگی چاره صفتیده ایشله‌یدی.
بو تحریم لر امریکا ده محکمه مقام لری نینگ فعال لرینی موزله تیش و اولرگه سفر قیلیش نی منع قیلیش نی اۉز ایچیگه آلیشی ممکن. انسان حق لری حمایه‌چی لری و امریکا نینگ کۉپلب متفقلری بو اقدام نی خلق آرا عدالت نی ضعیفلشتیووچی و بوتون دنیا بۉیلب انسان حق لری نینگ جدی بوزووچی لرینی جوابگرلیککه تارتیش حرکت لرینی زیانگه اوچره تووچی دېب بیله‌دیلر.
خلق آرا جنایی محکمه سی بو باسیم لرگه قره‌مسدن، روم اساسنامه‌سی اساسیده اۉز وظیفه‌لرینی عملگه آشیریش ده دوام اېتیشینی و اۉز مستقل لیگیدن واز کېچمسلیگینی تاکیدله‌دی.
منبع: رویترز
🌐
