طالبان حکومتی نینگ اطلاعات و فرهنگ وزیری شیر احمد حقانی، میدان وردک ولایتیده «مجاهد» حربی موزیمی نینگ آچیلیش مراسمیده، اۉز کوچلری دنیا نینگ کتته کوچلرینی ارزان قوراللر و چیکلنگن امکانیتلر بیلن یېنگگنینی معلوم قیلدی.
جناب حقانی پنجشنبه کونی بو مراسمده گه سۉزلب، طالبان کوچلری ارزان بها گه یسه لگن ماینلردن فایده لنیب، امریکا قۉشینلریگه آغیر مالی و جانی تلفات یېتکیزگنینی و بو وضعیت امریکانی افغانستانده گی اوروشنی توخته تیشگه مجبور قیلگنینی ایتدی. او بیر ماین گه اشاره قیلیب ایتگن: «سیز کۉریب تورگن بو ماین جوده ارزان پولگه یسه لگن و اولرنینگ قیمت بها موترلری و تانکلری شو بیلن یۉق قیلینگن. دېمک، جوده آز هزینه بیلن اولرنینگ جوده قیمت بها تجهیزاتلری یۉق قیلینگن کی، بو امریکا و اونینگ اتفاقچیلرینی سرآسیمه قیلدی.»
اطلاعات و فرهنگ وزیری، افغانلر تاریخ بۉییچه هر قنده‌ی تجاوزگه قرشی تورگنلرینی و کېله جکده هر بیر تجاوزچی هم شونده‌ی تقدیرگه دوچار بۉلیشینی قۉшимچه قیلدی. او پاکستانگه اشاره قیلیب، قۉنشی مملکتلرنی هم اۉز ایچیگه آلگن هر قنده‌ی مملکت افغانستان حریمینی پامال قلسه، قاطع جواب بیلن روپه ره بۉلیشینی اورغوله دی.
شونینگدېک، میدان وردکده طالبان نینگ اطلاعات و فرهنگ رئیسی حبیب الله مجاهد، بو موزیم نینگ حربی، تاریخی، قلمی و ۳۰۵۱ «شهید» نینگ اسمینی اۉز ایچیگه آلگن تۉرت قسمی بارلیگینی ایتدی. اونینگ ایتیشیچه، اولردن ۵۳ ته‌سی «فدایی» ایکن. او موزیمده ۲۵۰ قدیم اثر و ۲۶۱ حربی اثر کۉرگزمه گه قۉییلگنینی بیلدیردی.
جهادی اثرلرنی سقلش عمومی ریاستی نینگ جهادی اثرلر و حجت‌لرینی ثبت قیلیش رئیسی سعید خوستی، بو اثرلرنی ییغیشدن مقصد، «جهاد» پیامینی کېله جک نسللرگه یېتکزیش ایکنینی ایتدی. او شونداق دېدی: «میلیونلر دالرلیک بیر کتته امریکایی تانک، شو وسیله لر بیلن پارتله تیلگن. بولر همه سی جهاد اثرلری دیر و اسلامی امارت رهبری تامانیدن بیزگه بو اثرلرنی ییغیش وظیفه‌سی تاپشیریلگن.»
میدان وردک اطلاعات و فرهنگ ریاستی نینگ معلوماتیگه کۉره، شوروی اتحاد نینگ افغانستانگه باسقینی پیتیده افغانلر تامانیدن قوللنگن بعضی حربی قوراللر و اثرلرنی ییغیب، بو موزیمده سقلش اوچون سعی و حرکتلر دوام اېتماقده.
منبع: محلی گزارشلر
🌐
