طالبان حکومتی نینگ ایچکی ایشلر وزیرلیگی سرپرستی سراج الدین حقانی، بو گروه نینگ مسئوللریگه پولیس نینگ ینگی تصدیق ایتیلگن قانونیدن چیققن صورتده جدی جزا بیلن روپه‌رو بۉلیشلریدن آگاهلنتیردی. او بو سۉزلرنی اوشبو قانوننی تانیشتیریش و تشریح ایتیش اوچون اۉتکزیلگن بیر ییغیلیشده بیان قیلدی.
جناب حقانی، طالبان نینگ کۉپ سانلی مسئوللری اشتراک ایتگن بو ییغیلیشده، قانوننی بوزگنلیک اوچون بیرینچی مرته مسئوللرگه آگاهلنتیروو بیریلیشینی، لیکن ایککینچی مرته بوزیلگن صورتده بېلگیلنگن جزاگه تارتیلیشینی ایتدی. او بو قانون نینگ ولسوالی‌لر، آمریت‌لر و مدیریت‌لرده تدریس آرقه لی پولیس نینگ برچه خادملریگه تانیشتیریلیشی و انگله تیلیشی کېره ک لیگینی تاکیدله‌دی.
طالبان حکومتی نینگ ایچکی ایشلر وزیرلیگی سرپرستی شونینگدېک بو گروه اداره لریده فساد نینگ آلدینی آلیشنی تاکیدلب، بو باره‌ده جدی چاره‌لر کۉریلیشینی طلب قیلدی. او حکومتی منصب لر نینگ موقت امانت ایکنینی و هیچ کیم نینگ اولرگه شخصی ملک کۉزی بیلن قره‌مسلیگی کېره ک لیگینی بیلدیردی.
بو بیانلر، طالبان حکومتی نینگ کنترولی آستیده گی تورلی اداره لرده اداری فسادنینگ کینگه‌ییشی حقیده گی کۉپلب گزارش لر ترقه لیاتگن بیر پیتده اورته گه تشلنماقده. انسانی حق فعاللری و بعضی خلق ارا تشکیلاتلر هم پولیس نینگ ینگی قانونی نینگ محتواسیدن خواطر بیلدریب، اونی اساسی ایرکینلیکلر و وطنداشلرنینگ حق لری، اینیقسه تینچ ییغیلیشلر حقی نی چیکلاووچی دیب آته‌دیلر.
شونده‌ی بولسه‌ده، طالبان حکومتی مسئوللری، پولیس نینگ ینگی قانونی پولیس فعالیتلری اوچون کینگ چوکات یره تیشینی و عامه نظم و خوفسیزلیکنی تامینلشده یاردم بیریشینی ایتماقده‌لر. بو قانوننی بوزگنلیک اوچون بېلگیلنگن جزالر حقیده هلی کۉپراق معلومات بیریلمه‌گن.
منبع: Zarin TV
🌐
