بیرلشگن ملتلر تشکیلاتی نینگ افغانستان بۉییچه ینگی خاص وکیلی و یوناما رهبری رباب فاطمه، اوشبو تشکیلات نینگ افغان خلقینی قۉللب-قوّتلاшни دوام اېتتیریشینی تأکیدله‌دی.
فاطمه خانم شنبه کونی، ۲ عقرب، بیرلشگن ملتلر تشکیلاتی نینگ تأسیس اېتیلگنی نینگ ۸۱ ییللیگی مناسبتی بیلن یۉلله‌گن پیامیده بو مطلبنی بیان قیلدی. او اۉز پیامیده شونده‌ی دېدی: «افغانستانده‌گی مسئولیتلریمنی اوشبو مملکت خلقی، اولرنینگ مدنیتی و بای میراثیگه چوقور حرمت بیلن باشله یمن و خلق نینگ سۉزلرینی اېشیتیشگه، اولر بیلن همکارلیک قیلیشگه و یانیده ایشلشگه وعده بېره من.»
یوناما رهبری نینگ قۉشیمچه قیلیشیچه، بیرلشگن ملتلر تشکیلاتی تقریباً سَککیز اون ییلدن بېری اوروشلر و قیینچیلیکلر دوریده
، شونینگدېک ترقیات و فرصتلر پیتلریده هم افغانلر یانیده بۉلگن. بو دواملی حضور اوشبو تشکیلات نینگ افغانستانگه نسبتتن چوقور تعهدینی کۉرسته‌دی.
او، افغانستان نینگ کېله جگی او مملکت خلقی نینگ قۉلیده اېکنینی و بیرلشگن ملتلر تشکیلاتی بیر متعهد شریک صفتیده افغانلر اۉز کېله جکلرینی اۉزلری قوریشلری اوچون اولرنینگ یانیده قالیشینی تأکیدله‌دی. بو بیانات افغانستان انسانپرورلیک و انسانی حقلر بحرانی کبی کۉپلب قیینچیلیکلرگه روپه ره بۉلگن بیر پیتده بیریلماقده.
یوناما، یعنی بیرلشگن ملتلر تشکیلاتی نینگ افغانستانده‌گی یاردم هیئتی، افغان خلقینی تینچلیک و استقرار یۉلیده قۉللب-قوّتله یدیگن بیر سیاسی مأموریت دیر. بو مأموریت نینگ وظیفه لریگه انسانی حقلر وضعيتینی نظارت قیلیش، انسانپرورلیک یاردملرینی موافقلشتیریش و سیاسی جریانلرنی حمایت قیلیش کیره‌دی.
خلق ارا همجمعیت و افغان خلقی بیرلشگن ملتلر تشکیلاتیدن حاضرگی بحراننی حل اېتیشده، خصوصاً خاتین-قیزلر حقلری و میلیونلب محتاج انسانلرگه حیاتي یاردملرنی یېتکزیشده فعالراق رول اۉینه شینی کوتماقده.
منبع: رسانه لر
🌐
