د افغانستان لپاره د ملګرو ملتونو د سرمنشي ځانګړې استازې او د یوناما مشرې، رباب فاطمې، ټینګار کړی چې دا سازمان به د افغانانو ملاتړ ته دوام ورکړي.
اغلې فاطمې د شنبې په ورځ، د لړم په ۲مه، د ملګرو ملتونو د تاسیس د ۸۱مې کلیزې په مناسبت په یوه پیغام کې دا موضوع روښانه کړه. هغې په خپل پیغام کې وویل: «په افغانستان کې خپل مسوولیتونه د دغه هېواد خلکو، د هغوی کلتور او بډایه میراث ته په ژور درناوي پیلوم او ژمنه کوم چې د خلکو خبرو ته به غوږ نیسم، له هغوی سره به تعامل کوم او تر څنګ به یې کار کوم.»
د یوناما مشرې زیاته کړه چې ملګري ملتونه نږدې اته لسیزې کیږي چې د جګړو او ستونزو پر مهال، او همداراز د پرمختګ او فرصتونو په وختونو کې د افغانانو تر څنګ پاتې شوي دي. دا دوامداره حضور د افغانستان په وړاندې د دې سازمان ژوره ژمنتیا په ګوته کوي.
هغې ټینګار وکړ چې د افغانستان راتلونکی د دغه هېواد په خلکو پورې اړه لري او ملګري ملتونه به د یوه ژمن شریک په توګه د افغانانو تر څنګ پاتې شي، څو هغوی خپل راتلونکی په خپله جوړ کړي. دا بیانیه په داسې حال کې خپریږي چې افغانستان له ګڼو ننګونو، د بشري او بشري حقونو له بحران سره مخ دی.
یوناما، یا په افغانستان کې د ملګرو ملتونو مرستندوی پلاوی، یو سیاسي ماموریت دی چې د سولې او ثبات د ټینګښت په لاره کې د افغانانو سره د مرستې لپاره کار کوي. د دې ماموریت په دندو کې د بشري حقونو د وضعیت څارنه، د بشري مرستو همغږي کول او د سیاسي پروسو ملاتړ شامل دي.
نړیواله ټولنه او افغانان له ملګرو ملتونو څخه تمه لري چې د اوسني بحران، په ځانګړې توګه د ښځو او نجونو د حقونو په برخه کې او د میلیونونو اړمنو کسانو لپاره د حیاتي مرستو په رسولو کې فعال رول ولوبوي.
سرچینه: رسنۍ
🌐
