طالبان حکومتی نینگ ایچکی ایشلر وزیرلیگی پکتیکا ولایتی نینگ مرکزی شرنه شهری نینگ تورلی قسملریده اونلب مداربسته کمره لر اۉرنه تگنینی خبر بېردی.
اوشبو وزیرلیک بوگون (شنبه، ۲ عقرب) بیر اعلامیه ترقه تیب، بو کمره لرنینگ یېتتی یریم میلیون افغانی خرجت بیلن اۉرنتیلگنینی ایتگن. اعلامیه گه کۉره، کمره لرنی اۉرنه تیشدن مقصد «امنیتنی تأمینلش و احتمالی امنیتی و جرمی حادثه لرنینگ آلدینی آلیش» دیر.
اوشبو کمره لرنینگ ایشگه توشیریلیش مراسمیده طالبان مسئوللری پکتیکا اهالیسیدن امنیتنی تأمینلش یۉلیده اوشبو گروه بیلن همکارلیک قیلیشلرینی سۉره‌گن. بو اقدام طالبان نینگ مملکت نینگ مختلف شهرلریده، خصوصاً کابلده، نظارتنی کوچه‌یتیریش بۉییچه کینگ قورساقلی سعی و حرکتلری نینگ بیر قسمی دیر.
طالبان بوندن آلدین هم کابل و باشقه شهرلرده مینگلب مداربسته کمره لر اۉرنه‌تگن اېدی. طالبان رسمی لری هرچند بو کمره لرنی اۉرنه تیشدن مقصد امنیتنی تأمینلش اېکنینی ایتسه لر-ده، اما طالبان تامانیدن فقرالرنینگ شخصی حریمینی پامال اېتیلیشی حقیده کینگ خواطرلر موجود.
انسانی حقلر فعاللری و فقرالر، بو نظارت سیستمیدن مخالف لر، مدنی فعاللرنی باستریش و فردی آزادلیکلرنی چېکلشده فایده لنیشی ممکن لیگیدن تشویش بیلدیرماقده. منتقدلرنینگ ایتیشیچه، طالبان کنترولی آستیده شخصی معلوماتلرنی سقلش اوچون انیق قانون نینگ یۉقلیگی، بو کمره لرنینگ جامعه نی تۉلیق نظارت قیلیش قورالیگه ایلنیشیگه سبب بۉلیشی ممکن.
هر حالده، طالبان بو خواطرلرنی رد اېتیب، اوشبو لایحه‌لرنینگ امنیتی جهتلریگه اورغو بېرماقده. بو وضعیت، امنیت و فردی حریملر اۉرته‌سیده‌گی حساس موازنه حقیده جدی سواللر توغدیره‌دی.
منبع: طالبان نینگ ایچکی ایشلر وزیرلیگی
🌐
