بیرلشگن ملت لر تشکیلاتی نینگ رواجلنتیریش برنامه سی (UNDP) جنوبی کوریا نینگ مالی حمایتی بیلن افغانستان نینگ «اقتصادی تیکلش» برنامه سی نینگ ایکّینچی باسقیچینی (REVIVE II) باشلنگنیدن خبر بېردی. بو برنامه مملکت نینگ بیش کلیدی ولایتیده تطبیق ایتیله دی.
بو تشکیلات دوشنبه کونی، ۴ عقرب ده، ایکس اجتماعی ترماغیده بیر پیام ترقه تیب افغانستانده محلی اقتصادنی قیته قوریش و کوچه‌یتیریش اوچون سعی و حرکت لرنینگ ینگی بیر باسقیچی باشلنگنینی اعلان قیلدی. بو اقدام اوشبو برنامه نینگ بیرینچی باسقیچی نینگ قولگه کیریتگن یوتوقلری نینگ دوامیده عملگه آشیریلماقده.
بیرلشگن ملت لر تشکیلاتی نینگ رواجلنتیریش برنامه سی اعلامیگه کۉره، اقتصادی تیکلش نینگ ایکّینچی باسقیچی تۉرت اساسی محورگه تمرکز قیله دی: خلق معیشتینی کوچه‌یتیریش، اجتماعی زیربنا لرنی قیته قوریش، اقتصادنی عمومی تیکلش و جمعیت لرنینگ بحران لرگه قرشی چیدم لی لیگینی آشیریش. بو برنامه نینگ مقصدی عایله لرگه پایدار درآمد قولگه کیریتیش و اولرنینگ تورموش شرایطینی یخشی لش گه یاردم بېریش دیر.
بو برنامه تطبیق ایتیله دیگن ولایت لر کابل، ننگرهار، کنر، پکتیا و غزنی نی اۉز ایچیگه آله دی. بو ولایت لرنینگ تنلنیشی احتیاج لر و پروژه لرنی موفقیتلی اجرا ایتیش اوچون موجود ظرفیت لرنی بهالنتیریش اساسیده عملگه آشیریلگن.
بیرلشگن ملت لر تشکیلاتی نینگ رواجلنتیریش برنامه سی افغانستانده گی دفتری نینگ ایتیشیچه، بیرلشگن ملت لرده جنوبی کوریا نماینده لیگی نینگ مالی حمایتی بو باسقیچنی یولگه قوییشده حیاتی بۉلگن. بو همکارلیک حاضرگی قیین اقتصادی شرایطده خلق ارا جمعیت نینگ افغانستان خلقیگه یاردم بېریش تعهدینی کورسه ته دی.
اقتصادی تیکلش برنامه سی نینگ بیرینچی باسقیچی هم اوتگن چاغلرده ایش اورنی یره تیش و کیچیک کسب و کارلرنی حمایت قیلیش ساحه سیده موفقیت لر بیلن همراه اېدی. ایکّینچی باسقیچ نینگ پایدارلیک و چیدم لی لیککه کۉپراق تمرکز قیلیشی بیلن، بو بیش ولایت نینگ محلی اقتصادیده اوزاق مدتلی تاثیرات قوییشی و مملکت عمومی اقتصادی وضعیتی نینگ یخشی لنیشیگه کمک قیلیشی کوتیله دی.
منبع: بیرلشگن ملت لر تشکیلاتی نینگ رواجلنتیریش برنامه سی
🌐
