بلومبرگ خبر شبکه‌سی نینگ گزارش بېریشیچه، امریکا حکومتی بیر قطار افغان پناهچیلرنی پاکستانگه اخراج قیلیشنی ریجه لشتیرماقده. ایتیلیشیچه، بو کیشی لر ارا سیده افغانستانده امریکالیک کوچلر بیلن همکارلیک قیلگن افغان لرنینگ یقینلری هم بار.
بلومبرگ دوشنبه کونی، ۴ عقرب ده، امریکا فدرال دولتی نینگ بیر مقامی و مهاجرت وکیل لریگه تیه نیب گزارش بېردی کیم، حبسگه آلینگن بیر قطار افغان لرگه تېزلیکده پاکستانگه اخراج قیلینیشلری حقیده معلومات بېریلگن. بو رسانه قۉشیمچه قیلدی کیم، بو کیشی لرنی انتقال بېره دیگن اوچاق نینگ پروازی کیله سی هفته لرده عملگه آشیریلیشی ممکن، لیکن امریکالیک مقام لر حاضرگچه بو ریجه حقیده رسمی روشده ایضاح بېرگن ایمسلر.
امریکالیک کوچلرنینگ افغان همکارلریدن حمایت قیلیش ساحه سیده فعالیت قیله دیگن «افغان ایوک» تشکیلاتی نینگ ایتیشیچه، لویزیانا ایالتی دن حبسگه آلینگن افغان لرنی انتقال بېریش اوچون بیر مخصوص پرواز نظرده توتیلگنی نی کۉرسه ته دیگن معلومات لرنی قولگه کیریتگن. بو تشکیلات نینگ ایتیشیچه، حبسده گی لرنینگ بیر قسمیگه پاکستانگه یوباریلیشلری ایتیلگن، حال بو کیم باشقه بیر گروه افغانستان مقصدی ایکن لیگیدن خبر تاپگن.
افغان ایوک نینگ امریکا دولتی ده گی اۉز منبعلریدن نقل قیلگن معلوماتلریگه کۉره، پاکستان بو کیشی لرنی افغانستانگه انتقال بېریش اوچون بیر ترانزیت یۉلی صفتیده قوللنیلیشی ممکن. بو تشکیلات تاکیدله‌دی کیم، حاضرگچه حبسده گی لرگه سفر سندلری کۉرسه تیلمه‌گن و حتی اولرنینگ وکیل لری هم اۉز مؤکل لری نینگ سونگگی مقصدی دن خبرسیز دیرلر.
افغان ایوک اعلان قیلدی کیم، ۲۲ میزان دن بویان، امریکا نینگ ۱۱ ایالتی ده گی ۱۵ حبس مرکزی دن افغان لرنینگ احتمالی انتقالی حقیده کмиده ۳۰ گزارش قولگه کیریتگن. بو تشکیلات امریکا دولتی دن پرواز مقصدینی آیدینلشتیریشنی و حبسده گی لرگه افغانستانگه قیتیب باریش خطرلری حقیده اۉز تشویشلرینی اورته گه قۉییش اوچون فرصت بېریشنی سوره‌گن.
بو تشویش لر بیرلشگن ملت لر تشکیلاتی نینگ بو میلادي ییل باشی دن بویان پاکستان تامانیدن ۸۵ مینگ دن آرتیق افغان نینگ اخراج قیلینگنی حقیده گی آماری بیلن کوچه یگن. بو آمار کۉرسه ته دی کیم، امریکادن اخراج قیلینگن مهاجرلر هم احتمالا افغانستانگه یوباریله دی.
بو بیرینچی مرته ایمس کیم امریکا دولتی افغان مهاجرلرنی باشقه مملکت لرگه اخراج قیله دی. بوندن آلدین، اسوشیتدپرس خبر آژانسی ۱۲ نفر افغان وطنداشی نی هم اۉز ایچیگه آلگن بیر گروه مهاجرنینگ مرکزی افریقا جمهوریتی گه یوباریلگنی حقیده خبر بېرگن اېدی. دونالد ترامپ دولتی سونگگی آیلرده مهاجرلرنی اوچینچی مملکت لرگه اخراج قیلیش سیاستی نی کینگه‌یترگن.
منبع: بلومبرگ
🌐
