امریکا قشونی نینگ سابق افسری ویل سیلبر، بیر مقاله ده آگاهلنتیردی کیم، طالبانگه قرشی مقاومت گروه لری نینگ پاکستان بیلن احتمالی همکارلیگی، بو جبهه لرنی جدی مشکل لر بیلن روپه ره قیلیشی ممکن. او ایشانه دی کیم، اسلام‌آباد ممکن طالبان مخالف لریدن موقت فشار واسطه‌سی صفتیده فایده لنیب، کابل بیلن کیلیشووگه ایریشگندن کیین اۉز حمایتی نی توخته تیشی ممکن.
بو تحلیل نیویارک تایمز روزنامه سی نینگ گزارشی دن کیین نشر ایتیلدی. اوشبو گزارشده ایتیلگن ایدی کیم، پاکستان نینگ حربی و استخباراتی مقام لری طالبانگه مخالف قوراللی جریان لرنینگ رهبرلری بیلن اوچره شیب، بالقوه حمایت تکلیفینی اورته گه قۉیگنلر. بو اوچره شو لر پاکستان و سابق ایکی متفق بولمیش طالبان حکومتی اورته سیده گی مناسبت لرنینگ چېگره خوفسیزلیک مسئله لری سببلی جوده یامانلشگن بیر شرایطده یوز بېرگن.
امریکا قشونی نینگ مرکزی قوماندانلیگی (سنتکام) ده ایش سابقه سی بولگن ویل سیلبر، دوشنبه کونی «لانگ‌وار ژورنال» نشریه سیده نشر ایتیلگن بیر تحلیلده یازدی کیم، طالبانگه مخالف گروه لر بیر قیین تنلاو بیلن روپه ره دیرلر. بیر تاماندن، اولر مبارزه نی دوام ایتتیریش اوچون تشقی حمایتگه محتاج، لیکن باشقه تاماندن، پاکستان اونلب ییللر دوامیده طالبان نی حمایت قیلگن و بو گروه نینگ قدرتگه قیتیب کیلیشیده مهم رول اۉینه گن بیر مملکت دیر.
بو سابق امریکالیک افسرنینگ ایشانچیچه، هرچند اسلام‌آباد بیلن همکارلیک طالبان مخالف لری اوچون حربی حمایت زمینه سینی یره تیشی ممکن، لیکن بو خطر بار کیم، بو گروه لر اورته سیده گی ایچکی اختلاف لرنی کوچه یتیریب، افغانستان خلقی آره سیده گی سیاسی اعتبارلریگه زیان ییتکیزیب قۉییشی ممکن.
منتقد لر، اینیقسه افغانستان نینگ سابق حکومت لری نینگ یوکسک مرتبه لی مقام لری، مقاومت جبهه لری نینگ پاکستان بیلن مناسبت لریدن تنقید قیلیب، اولرنی «خطرلی» دیب اته گنلر. اولر پاکستان نینگ بو گروه لردن اۉز منفعت لرینی تامینلش اوچون فایده لنیشیدن تشویشده لر.
اسلام‌آباد، طالبان حکومتی نی تحریک طالبان پاکستان کبی قوراللی گروه لرگه افغانستان توپراغی دن پاکستان خوفسیزلیک کوچلریگه قرشی فایده لنیشگه رخصت بېریش بیلن عیبله یدی؛ بو عیبلاونی طالبان هر دایم رد ایتیب کیلگن.
شونده ی بولسه ده، پاکستان نینگ اطلاعات وزیرلیگی شنبه کونی، ۲ عقرب ده، طالبان مخالف لریدن حمایت قیلیش حقیده گی گزارش لرنی رد قیلدی. بو وزیرلیک، امریکا نینگ افغانستان ایشلری بوییچه سابق نماینده سی زلمی خلیلزاد نینگ سوزلریگه واکنش اوله راق، بو ادعا لرنی اساسسیز دیب اته دی.
منبع: لانگ‌وار ژورنال
🌐
