طالبان کنترولی آستیده گی احصائیه و معلومات اداره سی نینگ آماری اساسیده، افغانستان نینگ صادراتی جاری شمسی ییل (۱۴۰۵) نینگ بیرینچی آلتی آییده، اۉتگن ییل نینگ خوددی شو دوریگه نسبت ۱۷.۳۵ فایز کمه یگن. بو کمه ییش مملکت اوچون ۱۲۵.۷ میلیون دالر صادراتی درآمدنینگ قولدن بېریلیشی معناسینی بیلدیره دی.
سه شنبه کونی، ۵ عقرب ده، نشر بولگن بو آمارگه کۉره، بو ییل نینگ بیرینچی آلتی آییده افغانستان نینگ صادراتی نینگ قیمتی ۵۹۸.۵ میلیون دالر بولگن، حال بوکه بو رقم ۱۴۰۴-ییلده ۷۲۴.۲ میلیون دالرگه ییتر اېدی. قوریق و تازه مېوه لر ۲۲۳.۵ میلیون دالر بیلن صادراتده اېنگ کۉپ حصه نی اېگلله گن.
مېوه لردن سۉنگ، طبی اۉسملیک لر ۱۳۶.۹ میلیون دالر، معدنی ماده لر ۳۲.۱ میلیون دالر و زراعتی اوروغ لر ۱۲.۵ میلیون دالر بیلن صادراتی قلم لرنینگ کیینگی قطار لریده قرار تاپگن.
عکسینچه، مملکت نینگ وارداتی اوشبو دورده آرتگن. بو ییل نینگ بیرینچی آلتی آییده واردات نینگ قیمتی ۶ میلیارد و ۶۵۶.۶ میلیون دالرگه ییتگن که بو اۉتگن ییل نینگ ۶ میلیارد و ۵۴۰.۳ میلیون دالریگه نسبت، ۱۱۶.۳ میلیون دالر آرتيشنی کۉرسته دی.
پاکستان بیلن تجارتی یۉل لرنینگ یاپیق قلیشی که اۉتگن ییلدن بېری طالبان حکومتی بیلن کېسکینلیک لر سببلی دوام اېتماقده، صادرات نینگ کمه ییشی نینگ اصلی دلیل لریدن بیری دیب ایتیله دی. هرچند واردات نینگ ایران و اورته آسیا مملکت لری کبی آلترناتیف یۉل لردن تأمینلنگنی کۉرینسه ده، لیکن پاکستان چېگره سی نینگ یاپیلیشی نینگ صادراتگه منفی تأثیری هلی هم دوام اېتماقده.
اۉتگن ییل افغانستان نینگ بوتون صادراتی نینگ ایکی میلیارد دالر اعلان بولگنینی نظردن توتیب، سونگگی آلتی آی نینگ آماری مملکت نینگ ایلگریگی سویه گه ییتیب باریش اوچون جدی قیینچیلیک لرگه روپه ره ایکن لیگینی کۉرسته دی. بو وضعیت افغانستان نینگ ضعیف اقتصادیگه قۉشیمچه باسیم کیلتیره دی.
منبع: متنی فایل
🌐
