جهان ساغلیق نی سقلش تشکیلاتی، ۲۰۲۶ نچی ییل نینگ اکتوبر آییگچه افغانستان نینگ ۲۵ ولایتیده آغیر یمان آزیقلنیش نی تداوی قیلیش اوچون ۸۷ مرکزگه حمایت قیلگنینی اعلان قیلدی. اوشبو تشکیلات نینگ ایتیشیچه، بو مرکز لر بېش یاشدن کیچیک بۉلگن ۲۷ مینگ و ۴۰۳ باله گه حیات نی قوتقرووچی خدمت لرنی فراهم قیلگن.
بیرلشگن ملت لر تشکیلاتی گه باغلیق بۇ اداره، اۉز گزارشیده، خدمت لر کیفیتی نی یخشی لش اوچون ۷۴ نفر خاتین قیز ساغلیق خادمی نی طبی اختلال لر بیلن بیرگه بۉلگن آغیر یمان آزیقلنیش مورد لری نی تداوی قیلیش اوچون اۉقیتگنینی قۉشیمچه قیلدی. بۇ برنامه، افغانستان ده کۉپ قیینچیلیک لر بیلن دوچ کېلگن ساغلیق سقلش سیستمی نی کوچه‌یتیریش اوچون کینگ قمره لی سعی و حرکت لرنینگ بیر قسمی دیر.
جهان ساغلیق نی سقلش تشکیلاتی شونینگدیک، جاری ییلده ضروری دارو لر، آزیقلنیش بسته‌لری، طبی اوسگنه‌لر و تزریق دستگاه لری نی فراهم قیلیش بیلن، یمان آزیقلنیش تداوی خدمت لری نینگ کوچه یتیریلیشیگه یاردم بېرگنینی ایتگن. اوشبو تشکیلات، تداوی گه اۉز وقتیده قول تاپیش، اساسی ساغلیق خدمت لری، تازه سوو و کسللیک لرنینگ آلدینی آلیش نینگ خاتین قیزلر و باله لر ساغلیغی نی سقلش اوچون حیاتی اهمیت گه اېگه ایکنینی تاکیدله‌گن.
بۇ حرکت لر، افغانستان ده انسانی بحران نینگ هلی هم یمان لشیب باره‌یاتگن بیر پیتده عملگه آشیریلماقده. بیرلشگن ملت لر نینگ انسانی ایش لرنی هماهنگ قیلیش اداره سی (اوچا) اۉتگن هفته ده انسانی یاردم لرنینگ همیشه فعال بیر اقتصاد و تأثیرلی حکومتدارلیک نینگ اۉرنینی باسه آلمسلیگیدن آگاه لنتیردی. اوچا نینگ ایتیشیچه، افغانستان ده تقریباً ۱۶ میلیون کیشی آغیر آچلیک بیلن روپه‌رو و اولردن ۳.۴ میلیونی عاجل وضعیتده قرار تاپگن.
ییمک خوفسیزلیک نهاد لری نینگ تحلیلی گه کۉره، قیش کېلیشی و خلق نینگ ساتیب آلیش قوتی نینگ توشیب کېتیشی بیلن، افغانستان ده آغیر ییمک خوفسیزلیگی گه دوچ کېلگن کیشی لر سانی نینگ ۱۹.۲ میلیون گه ییتیب باریشی کوتیله‌دی. اولرنینگ آره سیده، حداقل بېش میلیون کیشی نینگ آچلیک نینگ عاجل وضعیتیده بۉلیشی ممکن.
باله لرنینگ کېله جگی حقیده هم خواطرلر کۉپه یگن. بیرلشگن ملت لر تشکیلاتی نینگ معلوماتیگه کۉره، ۲۰۲۷ نچی ییلده آلتی آیلیکدن بېش یاشگچه بۉلگن تۉرت میلیون دن آرتیق باله نینگ آغیر یمان آزیقلنیش تداوی سیگه احتیاجی بۉلیشی کوتیله‌دی. بۇ آمار، دنیا جماعتی نینگ فوری دقتی و مملکت ایچیده پایدار حرکت لرنی طلب قیله‌دیگن فاجعه نینگ چقورلیگینی کۉرسته‌دی.
منبع: بیرلشگن ملت لر تشکیلاتی
🌐
