طالبان حکومتی نینگ ایچکی ایشلر وزیرلیگی نینگ مخدره ماده لرگه قرشی کوره ش معینی عبدالرحمان منیر، جاری میلادی ییلده افغانستانده مخدره ماده لر جرمی بیلن علاقه دار ۱۰ مینگ و ۶۵ کیشی نینگ قولگه آلینگنینی اعلان قیلدی. بۇ آمار «افغانستان اسلام امارتی نینگ مخدره ماده لر بیلن کوره شی: حقیقت لر و یوتوق لر» ناملی بیر ییغیلیشده ارائه ایتیلدی.
جناب منیر سه‌شنبه کونی (۵ عقرب) کابلده تشقی نماینده لر حضوری بیلن اۉتکزیلگن بو ییغیلیشده، طالبان حکومتی نینگ جاری ییلده مخدره ماده لرگه قرشی ۲۵ مینگ و ۱۱۶ عملیات اۉتکزگنینی ایتدی. اونینگ ایتیشیچه، بو عملیات لر نتیجه سیده اوشبو سانده گی کیشی لر قولگه آلینگن.
او، بو مدت ایچیده ۲۶ مینگ و ۵۰۰ هکتار کۅکنار و چرس ایکیلگن ییر نینگ یوق قیلینگنینی قۉشیمچه قیلدی. شونینگدیک، مخدره ماده لرنی پروسس قیلیش اوچون ۳۰۱ آزمایشگاه، ایکی کیمیاوی تابلیت لر (کا تابلیتی) ایشلب چیقرووچی کارخانه و ۱۵ الکولی ایچیملیک لر ایشلب چیقرووچی کارخانه کشف ایتیلیب یوق قیلینگن.
بو طالبان مقامی، حکومت لری نینگ مخدره ماده لرگه قرشی کوره شده گی یوتوق لریگه تاکید قیلیب، دنیا جماعتی دن دهقان لر اوچون اۉرین باسر تیریکچیلیک تأمین لش اوچون حمایت قیلیشنی ایسته‌دی. او، مخدره ماده ایکیشنی پایدار شکلده آلدینی آلیش اوچون قانونی زراعتی محصول لردن حمایت قیلیش نینگ ضروری ایکنینی ایتدی.
۲۰۲۱ نچی ییل نینگ اگست آیی ده افغانستان نی قیته قولگه کیریتگندن سونگ، طالبان رهبری هبت‌الله آخوندزاده، بیر فرمان چیقریب هر تورلی مخدره ماده ایکیش، ایشلب چیقریش و قاچاقینی منع قیلگن ایدی. طالبان حکومتی همیشه کۅکنار ایکیشنی صفرگه ییتکزگنینی ادعا قیلیب کېله‌دی.
لیکن، بیرلشگن ملت لر تشکیلاتی نینگ گزارش لری باشقه بیر تصویرنی کۉرسته‌دی. بو گزارش لر، کۅکنار ایکیش نینگ کمه ییشیگه قره‌مسدن، بو پدیده نینگ بوتونلی یوق بۉلمه گنی و بعضی منطقه لرده هلی هم دوام ایته یاتگنینی کۉرسته‌دی. بوندن تشقری، بیرلشگن ملت لر افغانستانده متامفتامین کبی صنعتی مخدره ماده لر ایشلب چیقریلیشی نینگ اهمیتلی درجه ده کۉپه یشیدن خواطر بیلدیرگن.
منبع: طالبان ایچکی ایشلر وزیرلیگی
🌐
