افغانستان آزادلیک جبهه‌سی (جفا) کنر ولایتیده طالبان نینگ بیر پوسته‌سیگه قیلینگن هجومده، اوشبو گروه نینگ بیر عضوی نی اۉلدیریب و باشقه اوچ عضوی نی یرهدار قیلگنینی ادعا قیلدی.
اوشبو جبهه چهارشنبه کونی بیر خبرنامه ده، بو هجوم سه‌شنبه کونی آخشام ساعت ۸ ده، ۵ عقربده، کنر ولایتی نینگ مرکزی اسعدآباد شهری نینگ نوآباد منطقه‌سیده گی طالبان پوسته‌سیگه اویوشتیریلگنینی اعلان قیلدی. خبرنامه‌ده ایتیلیشیچه، اوشبو جبهه نینگ کوچلری هجومدن سۉنگ اۉز قرارگاه لریگه قیتیب کیلگنلر.
آزادلیک جبهه‌سی بو هجوم، جمله دن اونینگ نوعیتی حقیده کۉپراق تفصیلات بیرمه‌گن. کنرده گی محلی طالبان مقام‌لری و اوشبو گروه نینگ مرکزی نطاقلری هنوزگچه بو ادعا حقیده فکر بیلدیرمه‌گنلر.
افغانستان آزادلیک جبهه‌سی، ۲۰۲۱- ییل آگست آییده طالبان نینگ تکرار قدرتگه ایگه بولیشی آرتیدن اوشبو گروهگه قرشی شکللنگن بیر نېچه قوراللی گروهلردن بیری دیر. بو جبهه اساساً سابق حکومت نینگ خوفسیزلیک کوچلریدن تشکیل تاپگن.
سونگگی آیلر و هفته‌لرده، آزادلیک جبهه‌سی کابل، پروان، کاپیسا، تخار و کنر کبی تورلی ولایتلرده طالبان نینگ موضع‌لری و کاروانلریگه قرشی بیر نېچه چریکی هجوم نینگ مسئولیتی نی اۉز بوйнига آلگن. بو هجوملر هرچند کیچیک مقیاسده اویوشتیریله‌دی، لیکن مملکت نینگ بعضی قسم‌لریده طالبان حکومتیگه قرشی قوراللی مقاومت نینگ دوامینی کورسته‌دی.
بیراق، طالبان حکومتی معمولاً مخالف قوراللی جبهه‌لرنینگ فعالیتینی کم اهمیتلی کۉرسته‌دی و اۉز کوچلری نینگ تلفاتی حقیده گی اولرنینگ ادعالرینی رد ایته‌دی یا بو حقده سکوت قیله‌دی. مستقل معلوماتگه ایریشیش چېکلنگنی سببلی، بو ادعالرنی بی‌طرف منبع‌لردن تاییدلش قیین دیر. منبع: افغانستان آزادلیک جبهه‌سی
🌐
