بیرلشگن ملت‌لر تشکیلاتی نینگ تعلیم، علم و فرهنگ اداره‌سی (یونسکو) خلق ارا رسانه سوادخانلیگی هفته‌لیگی مناسبتی بیلن بیر گزارشده، یاش‌لر آره‌سیده خبر مصرف ایتیش الگوسی نینگ جدی شکلده اۉزگرگنینی اعلان قیلدی.
اوشبو گزارشگه اساساً، تیکشیریلگن ۴۸ مملکتده ۱۸ یاشدن ۲۴ یاشگچه بۉلگن یاش‌لرنینگ ۵۲ فایزی، اۉز خبر و معلوماتلرینی اساساً اجتماعی ترماقلر، یوتیوب و تیک تاک کبی ویدیویی پلتفرملر، و مصنوعی ذکا چت باتلریدن آله‌دیلر. بو تاپیلمه، تلویزیون و روزنامه‌لر کبی عنعنوی رسانه‌لرنینگ بو نسل آره‌سیده اۉز جایگاهینی یوقاتگنینی کورسته‌دی.
یونسکو، بو اۉزگریش نینگ یاش نسلنی صرف خبر مخاطبلریدن، معلومات جریانینی ایشلب چیقرووچیلر، قیته ترقه تووچیلر و شکللنتیروچیلرگه ایلنتیرگنینی آگاهلنتیره‌دی. بو موضوع، رسانه سوادخانلیگی و معلوماتنی انتقادی بهالنتیریش قابلیتی نینگ اهمیتینی هر قچاندن هم کۉپراق ضروری قیله‌دی.
بو تحول، افغانستان یاش‌لری اوچون هم علیحده اهمیتگه ایگه دیر. آزاد رسانه‌لرگه ایریشیش چېکلنگن بیر مملکتده، یاش‌لر تعلیم، آگاهلیک کسب ایتیش و کونده‌لیک علاقه‌لر اوچون اینترنت و اجتماعی ترماقلرگه کۉپراق تکیه نه‌دیلر.
متخصص‌لرنینگ ایتیشیچه، معلوماتگه ایریشیش آسانلشگنی بیلن، لیکن انیق خبرلرنی ناتوغری معلومات، جعلی خبرلر و یاشیرین تبلیغاتدن اجره تیش، بیر حیاتی مهارتگه ایلنگن. بو مهارت بولمسدن، وطنداشلر یولدن آزدیریجی معلوماتلرگه قرشی کۉپراق ضرر کۉریشلری ممکن.
یونسکو، دولت‌لر، رسانه‌لر و تعلیمی اداره‌لردن وطنداشلر، خصوصاً یاش‌لر آره‌سیده معلوماتنی انتقادی بهالنتیریش مهارت‌لرینی کوچه‌یتیریش اوچون رسانه سوادخانلیگی تعلیم برنامه‌لرینی کینگه‌یتیریشنی سوره‌گن. بو ییل خلق ارا رسانه سوادخانلیگی هفته‌لیگی نینگ شعاری «همه میزنینگ رولی بار» دیر که معلوماتنی مسئولیت بیلن ایشلب چیقاریش و ترقه تیشده مشترک مسئولیتنی تاکیدله‌یدی. منبع: یونسکو
🌐
