معتبر منبع‌لر رسانه‌لرگه، ایران اسلام جمهوریتی نینگ بو مملکتگه پناهنده بولگن یوزلب سابق افغان حربی‌لری نینگ یشاش مدتی نی اوزه‌یترمه‌گنینی و اولردن افغانستانگه قیتیب باریشلرینی سوره‌گنینی خبر بیردی.
تهران و اصفهانده یشاوچی بیر قطار بو حربی‌لر، یشاش مدت‌لری نینگ توگه گنی یا توگه ش آستانه‌سیده ایکنینی ایتدیلر. اولرنینگ ایتیشیچه، یشاش مدتی نی اوزه‌یتیریش اوچون تیگیشلی اداره‌لرگه مراجعه قیلگنلرده، درخواستلری قبول ایتیلمه‌گن و اولرگه اوزه‌یتیریش اوچون ینگی بیر بویروق چیقاریلمه گنی ایتیلگن.
بو کیشیلرنینگ کۉپچیلگی آلدین تهرانده ترور قیلینگن سابق پولیس قوماندانلریدن جنرال اکرام الدین سریع دفتری آرقه لی یشاش حقینی آلگن ایدیلر. بیر منبع، فقط اصفهانده تقریباً ۵۰۰ سابق حربی بو مشکل بیلن روپه‌رو ایکنینی ایتدی. اونینگ ایتیشیچه، جنرال سریع دفترده تقریباً ۱۷ مینگ حربی ثبت قیلینگن ایدی، لیکن ایرانده گی سابق حربی‌لرنینگ عمومی سانی بوندن کۉپراق دیر.
بو سابق حربی‌لر افغانستانگه قیتیب باریشدن جدی خواطرده دیرلر. اولر، مجبوراً قیتیب یوباریلیش صورتیده، طالبان تامانیدن قولگه آلینیش، شکنجه و قتل کبی جدی خطرگه دوچ کېلیشلریدن آگاهلنتیره‌دیلر. جنرال سریع دفترگه یقین بیر منبع، ایران‌دن قیتیب کیلگندن سۉنگ بیر قطار حربی‌لرنینگ طالبان تامانیدن اۉلدیریلگنینی کورستووچی معتبر حجت‌لرگه ایگه ایکنینی ایتدی.
او مثال صفتیده، بغلان ولایتیده بیر سابق حربی نینگ قتلیگه اشاره قیلدی که ایرانده یشاش مدتی اوزه‌یتیریلمه گنی سببلی افغانستانگه قیتیب کیلگن و یقینده طالبان تامانیدن عایله‌سی آلدیده اۉلدیریلگن ایدی.
اصفهانده یشاوچی بیر سابق قوماندان، حاضر سرنوشت سیزلیک بیلن روپه‌رو ایکنینی ایتدی. او قۉшимچه قیلدی: «بیلمه یمن، اگر یشاش مدتم اوزه‌یتیریلمه سه، مینی و عایله منی قنده‌ی بیر سرنوشت کوتماقده.» ایران سیاستیده گی بو اۉزگریش نینگ طالبان فشاری نتیجه‌سی می یا او مملکت نینگ ایچکی تحولاتی ایکنی انیق ایمس. منبع: افغانستان اینترنشنال
🌐
