مسکو بیلن مذاکره قیلیش طرفداری و اوکراینگه حربي یاردم بېریشگه مخالف بۉلگن ایلینا یوتووا، بلغاریا جمهور رئیس‌لیک سیلاوی نینگ ایکّینچی دوریده غلبه قازانیب، اوشبو مملکت نینگ بیرینچی عیال جمهور رئیسی بۉلدی. فرانسه خبر آژانسی دوشنبه ایرته لب، ۲-نومبر (۱۲ عقرب) کونی، خانم یوتووا غرب طرفداری سیاستچی آندری گیوروف بیلن بۉلگن رقابتده غالیب چیققنینی گزارش قیلدی.
اوشبو سیلاو، قاره دېنگیزده تجاري کېمه‌لرگه قره‌ته اویوشتیریلگن بیر قطار پیلوت سیز اوچاقلر هجومی منطقه‌ده خوفسیزلیک تشویشلرینی آرتیرگن بیر پیتده اۉتکزیلدی. روسیه و اوکراین اوروشی نینگ کینگه‌ییشی نتیجه‌سی دېب گمان قیلینگن بو هجوملر، اروپا نینگ مهم تجاري یۉلیدن بیریده بی‌ثباتلیککه سبب بۉلماقده.
اکتوبر آییده، بلغاریا ساحل‌لری یقینیده قاره دېنگیزده بیر نیچه کېمه نشانگه آلینیب، نتیجه‌ده ۲۱ کیشی هلاک بۉلگن یا-ده دېرک سیز یۉقالگن. بو حادثه‌لر منطقه‌ده‌گی کېسکینلیکنی کوچه یتیرگن و ساحل بۉییده‌گی مملکتلرنی جدي خوفسیزلیک تدبیرلرینی کۉریشگه مجبور قیلگن.
مسکو بیلن مذاکره قیلیش طرفداری بۉلگن چپ گرا سیاستچی، سابق جمهور رئیس رومن رادف، بو هجوملر روسیه منفعتیگه اویغون کۉرینیشینی ایتگن. او بو هجوملر بیلن باغلیق روسیه ایلچی‌سینی هم چقیرگن اېدی، لیکن اونینگ حکومتی مسکو نینگ بو هجوملرده مستقیم قۉلی بارلیگیگه دلالت قیلووچی هیچ قنده‌ی دلیل یۉقلیگینی تأکیدله‌گن.
خانم یوتووا نینگ غلبه‌سی، بلغاریا تشقی سیاستینی اوکراین اوروشیگه نسبت بی‌طرفراق موضع تامان یۉنه لتیریشی ممکن. او آلدینراق بیر نیچه مرته توقنشوولرنی توگه تیش اوچون دیپلوماتیک حل تاپیش ضرورتیگه اورغو بېریب، کی یفگه قورال-یراغ یوباریشگه قرشی چیققن.
ایلینا یوتووا بو غلبه بیلن تاریخ یارتیب، بالکان منطقه‌سیده‌گی بو ۶.۴ میلیون اهالیگه اېگه مملکتده جمهور رئیس‌لیک مقامیگه اېریشگن بیرینچی عیال صفتیده تانیله‌دی. تحلیلچیلرنینگ ایتشیچه، اونینگ روسیه و منطقه خوفسیزلیگیگه نسبتاً توتگن یۉلی، اروپا اتفاقی و ناتو نینگ دقت مرکزیده بۉله‌دی.
منبع: فرانسه خبر آژانسی
🌐
