پاکستانلیک بیر رسمیسی، مملکت خوفسیزلیک کوچلری جنوبی وزیرستان چېگره منطقه‌سیده طالبان کوچلری تامانیدن اویوشتیریلگن «سبب سیز» اوق اوزیشلرگه جواب قَیترگنینی ادعا قیلدی. پاکستان نینگ دان روزنامه‌سی یکشنبه کېچه‌سی، ۱۰ عقرب (۱ نومبر)، خیبرپختونخوا ایالتی نینگ قویی جنوبی وزیرستان منطقه‌سی حاکم اورینباسریدن نقل قیلیب، پاکستان خوفسیزلیک کوچلری تیزلیک بیلن و تأثیرلی شکلده طالبان نینگ بیر نیچه پوسته‌سی و مدافعه مرکزینی نشانگه آلگنینی گزارش قیلدی.
اوشبو پاکستانلیک رسمی، طالبان جنگریلری تامانیدن پاکستان نینگ چېگره‌ده‌گی تیکشیروو پوسته لریگه قره‌ته سبب سیز اوق اوزیشلر دوام اېته یوتگنی‌نی ادعا قیلگن. او قۉشیمچه قیلگن: «پاکستان کوچلری نینگ جدي جوابی آرتیدن، افغان طالبان اۉز موضع‌لرینی ترک اېتیب، قاچیشگه مجبور بۉلدیلر.»
اوشبو توقنشوو، طالبان حکومتی و پاکستان اورته‌سیده‌گی چېگره کېسکینلیکلری نینگ اېنگ سونگگیسی بۉلیب، ۲۰۲۱-ییل آگست آییده طالبان نینگ افغانستانده قدرتنی قَیته قۉلگه کیریتگنیدن بویان کوپه یگن. هر ایکّی تامان بیر-بیرینی توقنشوولرنی باشلش‌ده عیبلب کېله‌دی.
بو واقعه، اوتگن هفته سه‌شنبه کونی هم طالبان جنگریلری و پاکستان خوفسیزلیک کوچلری جنوبی وزیرستان نینگ «انگور اده» چېگره منطقه‌سیده توقنشگن بیر پیتده یوز بېرگن. اوشبو توقنشوو هم تلفاتگه اېگه اېدی، لیکن اونینگ انیق سانی مستقل منبعلر تامانیدن تصدیقلنمه‌گن.
طالبان حکومتی رسمی‌لری حاضرگچه پاکستان تامانی نینگ بو ادعاسی حقیده هیچ قنده‌ی عکس العمل کورسه تمه‌گن. کابل و اسلام‌آباد، ایکّی مملکت آره‌سیده‌گی چېگره حسابلنگن دیورند چیزیغی توغریسیده اختلافگه اېگه و بو مساله هر دایم ایکّی مملکت اورته‌سیده‌گی کېسکینلیک نینگ اساسي سببی بۉلیب کیلگن.
منبع: دان
🌐
