طالبان حکومتی نینگ عامه صحت وزیرلیگی افغانستانده پولیو (فلج اطفال) واکسینی نینگ عمومی کمپاینی باشلنگنینی خبر بېردی. بو کمپاین دوشنبه کونی، ۱۱ عقرب، بوتون مملکت بۉیلب باشلنگن و تۉرت کون دوام ایته‌دی.
بو وزیرلیک نینگ سۉزچیسی، شرافت زمان امرخېل، اعلان قیلدی که، بو کمپاین نینگ مقصدی بېش یاشدن کیچیک ۲.۸ میلیون باله‌نی پولیو کسل لیگیگه قرشی واکسین قیلیش دیر. او همه عایله‌لردن بو ساحه‌ده صحی ایشلاوچیلر بیلن همکارلیک قیلیش‌لرینی سوره‌دی تا که هیچ قنده‌ی بالا واکسیندن قالیب کیتمه سین.
عامه صحت وزیرلیگی سۉزچیسی شونینگدیک مسجد امام‌لری، قومی یولباشچیلر و محلی نفوذلی کیشی‌لردن خلقنی واکسین تطبیقیگه تشویق قیلیش‌لرینی و بو ملی کمپاین نینگ موفقیتلی بولیشی اوچون واکسیناسیون تیم‌لری بیلن همکارلیک قیلیش‌لرینی سوره‌دی. بو همکارلیک اوزاق منطقه‌لرده‌گی همه باله‌لرگه ییتیب باریش اوچون حیاتی اهمیتگه ایگه.
افغانستان و پاکستان دنیاده وحشی پولیو ویروسی هلی هم بومی شکلده موجود بولگن یکانه ایکّی مملکت دیر. بو کسل لیکنی یۉق قیلیش اوچون کۉپ ییللیک سعی-حرکت‌لر ناامنلیک، قول تاپیش قیین چیلیگی و بعضی یالغان ایشانچ‌لر سببلی چالش‌لر بیلن دوچ کیلگن.
دنیا صحت تشکیلاتی (WHO) نینگ سونگگی گزارشیگه کۉره، ۲۰۲۶-میلادی ییل نینگ اکتوبر آیی نینگ اۉرته لریگچه، افغانستانده کمیده ۴۲ مثبت پولیو موردی ثبت ایتیلگن. بو آمار مملکتده ویروس نینگ دواملی آیله نیشینی و واکسیناسیون کمپاین‌لری نینگ دوام ایتتیریلیشی ضرورتی‌نی کۉرسه ته‌دی.
منظم پولیو واکسیناسیون کمپاین‌لری بو فلج قیلووچی کسل‌لیک نینگ تارقالیشینی آلدینی آلیش اوچون اساسی استراتیژی‌لردن بیری دیر. علاجی یۉق بو کسل‌لیک، فقط واکسین آرقه لی آلدینی آلینیشی ممکن و باله‌لرده دایمی معلولیت‌گه سبب بولیشی ممکن. بو کمپاین‌لرنینگ موفقیتی خلق نینگ عمومی همکارلیگی و صحی ایشلاوچیلرنی قوللب-قوتلشیگه باغلیق.
منبع: طالبان نینگ عامه صحت وزیرلیگی
🌐
