پاکستان اردوسی نینگ سۉزچیسی، احمد شریف چودری، کسکین و تینگی یۉق بیاناتی‌ده، طالبان حکومتینی پاکستان طالبان تحریکی (TTP) و بلوچستان آزادی‌بخش اردوسی (BLA) قطاریده، «هند نینگ نیابتی گروهی» دیب آته‌دی. او، کابل «تروریزمنی حمایت قیلگنلیگی» اوچون آغیر بها تۉله شی حقیده آگاهلنتیردی.
بو یوکسک مرتبه لی پاکستانلیک حربی رسمی دوشنبه کونی رسانه‌لرگه ایتدی که، افغانستان توپراغی هلی هم «غیردولتی عنصرلر» تامانیدن اداره ایتیلماقده. او، TTP و BLA گروه‌لری پاکستان نینگ ملی امنیتیگه قرشی هلاکتلی هجوم‌لر اوچون افغانستان ایچیده‌گی امن پناه‌گاه‌لردن فایده لنه یاتگنینی آچیقله‌دی.
جناب چودری تاکیدله‌دی که، اسلام‌آباد طالبان حکومتیدن فقط بیر انیق طلبگه ایگه و او هم بو گروه‌لردن هر قنده‌ی حمایتنی فوری توخته‌تیش دیر. او آگاهلنتیردی: «اگر طالبان حکومتی بو گروه‌لرنینگ حرکت‌لرینی آلدینی آلیش اوچون عملی اقدام قیلمه سه، آغیر بها تۉله‌یدی.»
بو عیبلاولر و آگاهلنتیریشلر، تورخم یۉلی و جنوبی وزیرستان نینگ انگور اده منطقه‌سیده پاکستان و طالبان چیگرا کوچلری آره‌سیده آغیر آتشمه یوز بیرگنیدن بیر کون کیین بیان ایتیلدی. بیر نیچه ساعت دوام ایتگن بو توقنشوولرده، بیر پاکستانلیک تینچ اهالی اۉلدیریلدی و تورخم یۉلی وقتینچه‌لیک یاپیلدی.
بو، کابلده طالبان نینگ قدرت‌گه قیتیب کیلیشی‌دن بویان پاکستان اردوسی تامانیدن طالبانگه قرشی اینگ کوچلی موضع دیر و ایکّی تامان آره‌سیده‌گی مناسبت‌لرنینگ تنشلیگی اوجگه چیققنینی کۉرسه ته‌دی. بوندن آلدین هم پاکستان نینگ اطلاعات وزیرلیگی چیگرا آشه تروریزمگه قرشی کوره شنی اسلام‌آباد نینگ «قیزیل چیزیغی» دیب آته‌گن ایدی.
طالبان حکومتی هر دایم افغانستان توپراغیده پاکستان طالبان تحریکی جنگریلری نینگ حضوری و فعالیت‌لرینی رد ایتیب کیلگن. هر حالده، اسلام‌آباد کۉپ مرته طالباندن بو گروه‌لرنی مهار قیلیش اوچون جدی و تصدیقلنیشی ممکن بولگن اقدام‌لرنی طلب قیلگن، بو طلب پاکستان نینگ ایتشیچه هلی هم جواب سیز قالگن.
بو تنشلیک‌لر منطقه امنیتی و افغانستان نینگ نازک وضعیتی اوچون کینگ دایره لی عاقبت‌لرگه ایگه بولیشی ممکن. بیر زمان‌لر یقین حسابلنگن کابل و اسلام‌آباد آره‌سیده‌گی مناسبت‌لر، حاضر اۉزی نینگ اینگ توبن سویه‌سیگه ییتگن.
منبع: پاکستان رسانه‌لری
🌐
