امریکا نینگ نماینده‌لر مجلسیده‌گی افغان اصللی نماینده عایشه وهاب، ارا دور سایلولریده کالیفرنیا ایالتی نینگ اۉن تۉرتینچی سیلاو حوزه‌سیده اۉز اۉرنینی تۉلیق ایکّی ییللیک بیر دوره اوچون سقلب قالیشگه حرکت قیلماقده. او بوندن آلدین بیر مخصوص سیلاوده سابق نماینده نینگ قالگن دوره‌سینی تۉلدیریش اوچون بو منصبگه یۉل تاپگن ایدی.
سی بی‌اس نیوز معلوماتیگه کۉره، وهاب اۉز سیلاو کمپینیده اقتصادی و معیشتی موضوعلرگه دقت قره‌تگن. او حیات خرجتلرینی کمه‌یتیریش، انصاف سیز نرخلرنینگ آشیب باریشیگه قرشی کوره شیش، ایجاره‌چیلر اوچون مالیات تخفیفلرینی کینگه‌یتیریش و ثابت درآمدلی یاشلی عایله‌لرنی حمایه قیلیشنی اۉزینینگ اساسی ترجیحلریدن اعلان قیلگن.
کالیفرنیا ایالتی نینگ سنا مجلسیده عضو بۉلگن وهاب، او دورده شرکتلر نینگ یاشیرین خرجتلریگه قرشی کوره شیش و نرخ قۉییشده سوءاستفاده‌لیک نینگ آلدینی آلیش اوچون سعی-حرکت قیلگنینی ایته‌دی. او غلبه قازانگن تقدیرده، بویوک شرکتلر انحصاریگه قرشی کوره شیشنی دوام ایتتیریشگه وعده بېرگن. او کالیفرنیا والیسی گوین نیوسام و مستقل سناتور برنی سندرز کبی دموکرات حزبی نینگ کۉزگه کۉرینگن شخصیتلری حمایه‌سینی قۉلگه کیریتگن.
عایشه وهاب نیویارکده توغیلگن، لیکن تقدیر اونی کالیفرنیاگه آلیب کیلدی. آته‌سی اۉلدیریلگندن و آنه‌سی وفات ایتگندن سۉنگ، بیر افغان عایله‌سی اونینگ سرپرستلیگینی اۉز ذمه‌سیگه آلدی. او تحصیلاتینی فریمونت شهریده توگه تیب، سۉنگره جنوبی کالیفرنیا دانشگاهیدن دوکتورلیک درجه‌سینی آلدی.
بو سیلاوده وهاب نینگ اساسی رقیبی ملیسا هرناندز، دموکرات حزبی نینگ باشقه بیر نامزدی دیر. بو ایکّی نامزد اورته‌سیده‌گی رقابت سۉنگگی هفته‌لرده جوده کوچلی بۉلیب، اولرنینگ سیلاو کمپینلری اوچون میلیونلب دالر صرفلنگن. دوبلین شهری نینگ سابق شهرداری بۉلگن هرناندز، خوفسیزلیک کوچلرینی کوچه‌یتیریش و جنایتلرنی کمه‌یتیریشگه دقت قره‌تگن.
عمومی خوفسیزلیک بو رقابت نینگ اساسی موضوعلریدن بیریگه ایلنگن. وهاب مناظره‌لردن بیریده نیویارکده آته‌سی نینگ اۉلیمیگه اشاره قیلیب، که ۳۰ ییلدن سۉنگ هنوز حل ایتیلمه‌گن، قربانلر اوچون عدالت نینگ اهمیتیگه اورغو بېردی. مقابلده، هرناندز شهردارلیک دوریده پولیس سانی نینگ آشیریلیشی باره‌سیده‌گی کارنامه‌سیگه اشاره قیلدی.
منبع: سی بی‌اس نیوز
🌐
