هند چارشنبه کونی سریلانکا بیلن کېلیشوو امضا قیلدی، اونگه کۉره اوشبو مملکت نینگ عاجل طبی خذمتلریگه ۵٫۲۸ میلیون دالرلیک یاردم دایره‌سیده ۱۰۰ قۉشیمچه امبولانس ییتکزیب بېریله‌دی.
هند نینگ کلمبوده‌گی ایلچیخانه‌سی معلوماتیگه کۉره، مذکور کېلیشوو هند ساغلیقنی سقلش وزیری جی پی نادا اشتراکیده امضا اېتیلگن. اوشبو لایحه سریلانکانینگ عاجل ساغلیقنی سقلش ترماغینی کوچه‌یتیریش مقصدیده عملگه آشیریله‌دی.
هند نینگ حمایه‌سیده‌گی اوشبو عاجل طبی خذمتلر دستلب ۲۰۱۶ ییل نینگ جولای آییده ۷٫۵ میلیون دالر یاردم بیلن سریلانکانینگ غرب و جنوب ولایتلریده باشلنگن اېدی. اوشه باسقیچده ۸۸ امبولانس، بیر ییللیک چیقیم و عاجل مرکز قوریلگن اېدی.
کیینچه‌لیک ۲۰۱۸ ییلده بو برنامه هند باش وزیری نارندرا مودی و اوشبو مملکت رسمی‌لری آرقه‌لی ۱۵٫۰۲ میلیون دالر قۉشیمچه یاردم بیلن بوتون مملکت بۉیلب کېنگه‌یتیریلدی و ۲۰۹ ته ینگی امبولانس قۉشیلدی.
ینگی ۱۰۰ امبولانس نینگ قۉشیلیشی بیلن حاضرده ۳۲۲ عاجل موترگه اېگه بۉلگن سریلانکانینگ «۱۹۹۰ سوا سیریا» آتلیق بې‌پول ترماغی کینگه‌یه‌دی.
اوشبو اداره هر کونی ۱٬۰۰۰ دن ۱٬۲۰۰ گچه مریضنی تاشیش بۉییچه عاجل قۉنغیراقلرگه جواب بېرماقده و بې‌پول خذمت کۉرسه‌تماقده. هند ایلچیخانه‌سی بو لایحه‌نی ایکّی اولکه اۉرته‌سیده‌گی همکارلیک نینگ یارقین نمونه‌سی دیب باهاله‌دی.
هند ساغلیقنی سقلش وزیری منطقه بۉییچه ییتتی اولکه‌دن عبارت بیمستیک تشکیلاتی نینگ ساغلیقنی سقلش وزیرلری ییغینیده قتنه‌شیش اوچون کلمبوگه سفر قیلگن اېدی.
منبع: هند نینگ کلمبوده‌گی ایلچیخانه‌سی بیانیه‌سی
🌐
