البانیا باش وزیری اېدی راما ناتو حربی تشکیلاتی ۲۰۲۷ ییلده تیرانا شهریده اۉتکزیلیشی کېرهک بۉلگن باشلیغلر ییغینینی بیکار قیلگنینی معلوم قیلدی. بو قرار واشنگتن و اونینگ اروپالیک حلیفلری اۉرتهسیده جنجللر کوچهییب بارگن بیر پیتده آلیندی.
پنجشنبه کونی صحبت قیلگن راما، ناتو ییغینی قچان اۉتکزیلیشی بۉییچه هنوز هم مشترک قرار یۉقلیگینی، بیراق قطعی صورتده ۲۰۲۷ ییلده بۉلمسلیگینی ایتدی. اونینگ قۉشیمچه قیلیشیچه، اگر ۲۰۲۸ ییلده ییغین بۉلسه، بو تیراناده اۉتکزیلهدی.
ناتو باش کاتیبی مارک روته اسوشیتد پرس آژانسیگه بیرگن معلوماتیگه کۉره، بو اۉزگریش کته مسأله اېمسلیگینی و حربی تشکیلات اۉز تدبیرلری بۉییچه انعطافپذیر بۉلیب، ضرور بۉلگنده ییغین اۉتکزیلیشینی بیلدیردی.
امریکا قوشمه ایالتلری نینگ پرزیدنتی دونالد ترامپ اروپالیک حلیفلرینی حربی خرجتلرنی تۉلهمسلیک و واشنگتن سیاستیگه صمیمی بۉلمسلیکده تنقید قیلیب کېلماقده.
رویترز آژانسی نینگ خبریگه کۉره، ناتو اعضالری دونالد ترامپ بیلن جنجلدن قاچیش مقصدیده ییللیک ییغینلر سانینی کمهیتیریش اوستیده بحث قیلماقدهلر. شونینگدېک، دفاع وزیرلری نینگ اوچرهشوولری بیکار قیلیندی و تشقی ایشلر وزیرلری ییغینلری هم کمهیتریلگن.
امریکا دفاع وزیری پیت هگزت و تشقی ایشلر وزیری مارکو روبیو ناتو نینگ سۉنگی ییغینلریده اشتراک اېتمهگن یا-ده اولرنی وقتلیراق ترک اېتگن، بو اېسه تامانلر اۉرتهسیدهگی کۉریلمهگن کۉنسیزلیکلرنی کۉرسهتهدی.
منبع: رویترز و اسوشیتد پرس
🌐