کابل شهری نینگ تاریخی حضوری چمن میدانیده طالبان رهبری ملا هبتالله آخندزاده نامیگه کتته بیر مسجد قوریش قراری اهالی نینگ جدی ناراضیلیگیگه سبب بۉلدی. یشاوچیلر نان، ایش و ساغلیقنی سقلش همده حیات اساسی احتیاجلریگه کۉپراق محتاج ایکنلیکلرینی بیلدیردیلر.
زرین تی وی معلوماتیگه کۉره، شهر یشاوچیلری مذکور میدان یقینیده عیدگاه مسجدی، تبلیغچیلر مرکزی و باشقه نېچهلب کتته مسجدلر بارلیگینی بیلدیرگنلر. اولر نینگ ایتیشیچه، شهرده قالگن یلغوز تاریخی سپورت و تفریح جایینی مسجدگه ایلنتیرېش توغری اېمس.
خان ځاځی و جواد خادم کبی یشاوچیلر طالبان حکومتیدن بیر قنچه قۉشیمچه مسجدلر اۉرنیگه اهالی اوچون تورر جای، ایش اۉرینلری، شفاخانهلر، کتابخانهلر و کسبی اۉقوو مرکزلری قوریشنی طلب قیلدیلر.
باشقه بیر قطار یشاوچیلر هم جمعیتدهگی قمبغللیک و ایشسیزلیککه اشاره قیلیب، عامه لایحهلرنی رهبرلر نامی بیلن اتهلیشینی تَنقید قیلگنلر و یاشلر اوچون سپورت میدانلرینی سقلب قالیشنی سۉرهگنلر.
کابل مرکزی نینگ عیدگاه مسجدی و شاهشهید اۉرتهسیده جایلشگن حضوری چمنی تاریخی دورلردن بېری رسمی پریادلر، ملی بیرملر و فوتبال بیلن کرکت اۉیینلری نینگ اساسی مرکزی بۉلیب کېلگن.
محلی یشاوچیلر بو پارک نینگ یۉق قیلینیشی پایتاخت یاشلری اوچون آزغینه قالگن تفریحی و ساغلام محیطنی هم قولدن بېریشینی اورغوله گنلر.
منبع: زرین تی وی
🌐