طالبان حکومتی نینگ رهبری هبتالله آخوندزاده کابلدن قندهارگه قیتیش یۉلیده بیر قنچه ولایتلرده کمیده سکیز مسجد و جهادی مدرسهنینگ قوریلیش تاشینی قۉیدی.
طالبان حکومتی نینگ رسمیلری معلوماتیگه کۉره، او تۉنهاوُن زابل ولایتی نینگ مرکزیده بیر عیدگاه مسجدی و جامع مسجدنینگ تهدابینی قۉیگن. طالبان حکومتی نینگ سۉزلاوچیسی اۉرینباسری حمدالله فطرت نینگ ایتیشیچه، زابل عیدگاهی ۷۰ جریب و جامع مسجدی ۱۰ جریب یېرده قوریلهدی.
طالبان رهبری زابلگه یېتیب باریشیدن آلدین غزنی ولایتیده هم بیر مسجد و جهادی مدرسهنینگ قوریلیش تاشینی قۉییب، اوشبو پروژهلرنی باشلَب بېردی.
او شونینگدېک میدانوردک ولایتیده بیر جامع مسجد بیلن بیرگه ۲۰۰ اۉرینلی شفاخانهنینگ هم بنسټینی قۉیدی. طالبان رسمیلری اوشبو شفاخانه ۲۹ جریب یېرده و ۳۶۵ میلیون افغانی قیمت بیلن قوریلیشینی بیلدیرگن.
طالبان رهبری کابلده هم ایککی مسجد و بیر مدرسهنینگ بنسټینی قۉیگن بۉلیب، چمن حضوری منطقهسیده اونینگ نامیگه بیر کتته مسجد قوریلیشی کۉزده توتیلگن. او پایتختده باشقه بیر قنچه مسجدلرنی هم آچیب بېردی.
طالبان حکومتی نینگ حج و اوقاف وزیرلیگی اوشبو ییل دوامیده فقط کابل شهریده ۶۰ مسجد قوریلگنینی و ۵۰ دن آرتیق مسجد تداوملنگنینی معلوم قیلدی؛ بیر حالده که بیرلشگن ملتلر تشکیلاتی افغانستان اهالیسی نینگ یریمی اینسانپرورلیک یاردمگه محتاج ایکنینی اعلام قیلگن.
منبع: اطلاعات روز
🌐