عراق رسمیلری اوشبو مملکت نینگ جنوبی بصره شهریده‌گی بیر برق فابریکه‌سیده یوز بېرگن یانغین عاقبتیده کمیده تۉرت کیشی جان باقته‌نی و ۳۰ کیشی یره‌لنگنینی معلوم قیلدی.

رویترز آژانسی معلوماتیگه کۉره، بو یانغین بصره نینگ شمالی بۉلیگیده‌گی «حارثه» برق فابریکه‌سیده یوز بېریب، تصدی نینگ فعالیتینی بوتونلی تۉخته‌تیب قۉیگن.

عراق ملکی مدافعه اداره‌سی نینگ رسمیلری یانغین آلاولری یقین اطرافده‌گی اویلرگه هم تارقالگنینی بیلدیردی، بیراق هنوزگچه اویلرگه یېتکزیلگن زیانلر حقیده معلومات بېرمه‌گن.

عراق دولتی خبر آژانسی اۉت اۉچیرووچیلر و ملکی مدافعه تیم‌لری فابریکه‌ده‌گی یانغیننی بیرنچه‌لیک سعی-حرکت بیلن کنترول آستیگه آلگنینی خبر بېردی.

رسمیلر نینگ ایتیشیچه، حارثه برق فابریکه‌سی نینگ اساسی تولیدی ظرفیتی ۸۰۰ مېگاوات بۉلیب، حادثه‌دن ایلگری قریب ۴۰۰ مېگاوات ظرفیت بیلن فعالیت یوریتر اېدی.

حاضرگه قدر اوشبو یانغین نینگ حقیقی سببی یا-ده یوز بېرگن زیان نینگ عمومی مقداری بۉییچه رسمی معلوماتلر نشر اېتیلمه‌گن.

عراق نینگ برق ترماقلری اوزاق ییللردن بېری اینوېستیتسیه نینگ کملیگی، اسکیرگن نرسه‌لر و یخشی سقلنمه‌گنلیگی سببلی جدّی قیینچیلیکلرنی باشتن کچیریب کۉپراق اۉچیشلرگه دوچ بۉلماقده.

منبع: رویترز

🌐

Author