مدنی فعاللر، بشر حقوقلری قورقاووچیلری و محصللردن تشکیل تاپگن ۱۳ کیشیلیک هیئت بروکسلده هزارهلر نسلی نینگ قیرغینی، مقصدلی اولدیریشلر و مجبوری کوچیرولرگه عاید حجتلرنی اروپا پارلمانی اورینباسریگه تاپشیردی.
بو هیئت ۲۹ عقرب پنجشنبه کونی اروپا پارلمانی اورینباسری خاوی لوپز بیلن اوچرهشوو اوتکزیب، اروپا بیرلیگیدن قومی همده دینی باسیملرنی توختهتیش اوچون عملگه اوتیشنی سورهدی. اولر شونینگدیک اوشبو قوم نینگ نسلکوشیسی رسمیتگه تانیلیشینی طلب قیلدیلر.
مذکور ییغین اروپا مدنی جمعیتی خلقارا تشکیلاتی نینگ تشبثی بیلن اروپا پارلمانی اورینباسری دفتریده اۉتکزیلدی. اویوشتیرووچیلر بو حرکت ۲۰۲۱-ییلدن بیری دوام ایتیب کیلهیاتگنینی و بوندن آلدین کاتالونیا پارلمانیده هم حمایهلاوچی بیر اعلامیه ماقوللنگنینی ایتدیلر.
افغان قاچقینلرینی حمایه قیلیش، اینیقسه اولرنی مجبوری طرزده افغانستانگه قیترمسلیک و طالبان حکومتیگه سیاسی مشروعیت بیریشگه قرشی چیقیش اوشبو ییغین نینگ اساسی موضوعلریدن بیری بولدی.
هزارهلر نسلکوشیسینی رسمیتگه تانیتیش ایشچی گروهی باشلیغی بشیر اسکندری اوشبو موضوع فقط خلقارا ادارهلرده قالمهسدن، افغانستان ایچیده هم ملی بیر طلبگه ایلنیشی کیرهک دیب اورغولهدی. او حقیقتنی انیقلش و عدالتنی تامینلاش ضرورلیگینی بیلدیردی.
هیئت اعضالری نینگ ادعا قیلیشیچه، هزاره جماعهسی طالبان حکومتی آستیده سیستماتیک کمسیتیشلرگه روپهرو بولیب، بو حکومت جعفری مذهبینی چیکلگن و شیعه کتبخانهلریدن فقه کتابلرینی ییغیشتیرگن.
ییغین سونگیده هزارهلر نسلی نینگ قیرغینی حقیدهگی حجتلر توپلمی و کاتالونیا پارلمانی نینگ قراری اروپا پارلمانی رهبریتیگه تقدیم ایتیلدی.
منبع: اخبارات منبعلری
🌐