افغانستان نینگ عیاللر اعتراضی حرکتلری و مدنی فعاللری بیر مشترک بیانیه ده، اۉزبېکستان جمهور رئیسی نینگ قیزی سعیده میرضیایف نینگ بیرلشگن ملتلر تشکیلاتی عمومی ییغیلیشیده گی سونگگی نطقیگه عکس العمل کۉرستدیلر. اولر اۉزبېکستاندن طالبان حکومتی بیلن هر قنده ی سیاسی و اقتصادی تعامل نی انسان حقلری، خصوصاً عیاللر حقلری نینگ رعایت اېتیلیشیگه شرط قیلیشنی سۉره دیلر.
بو فعاللر اۉزبېکستان نینگ عیاللر سیاسی اشتراکی ساحه سیده گی یوتوقلرینی تقدیرلش بیلن بیرگه، خانم میرضیایف نینگ اۉز نطقی ده قۉشنی مملکتده گی «عیاللر و قیزلرنینگ فاجعه لی وضعیتی» گه هیچ قنده ی اشاره قیلمگنیدن چوقور تأسف بیلدیردیلر. اولر بېش ییلدن آرتیق واقتدن بېری افغان عیاللری نینگ تعلیم و ایش کبی اینگ اساسی حقلریدن محروم قیلینگنینی تاکیدله دیلر.
بیانیه ده کېلتیریلیشیچه، آمودریا نینگ بیر تامانیده گی «جنسیتي اپارتاید» گه قرشی سکوت سقلش، باشقه تامانیده عیاللر حقلریدن حمایت قیلیش، کۉز یومیب بولمه یدیگن بیر تناقض دیر. افغان فعاللر تاشکند نینگ افغانستان مسئله سیگه فقط اقتصادی و خوفسیزلیک زاویه سیدن قره شینی تنقید قیلیب، بو یانداشوو انسان حقلری نینگ سیستماتیک پایمال اېتیلیشینی عادیلشتیریش خطریگه اېگه ایکن لیگینی آگاهلنتیردیلر.
بو فعاللرنینگ ایتیشیچه، «هیچ قنده ی تجاری یا انرژی پروژه سی، بیر مملکت اهالیسی نینگ یرمی حذف قیلینگن حالده، پایدار بیر ثباتنی ایجاد قیله آلمس.» اولر جنسیتي اپارتاید گه روپه ره بولگنده، سکوت نینگ بیطرفلیک معناسینی بیرمسلیگینی، بلکه موجود وضعیتدن یون باسیش ایکن لیگینی واضح قیلدیلر.
بو حرکتلر اۉزبېکستان مقام لریدن طالبان تامانیدن عیاللرگه قرشی قۉیلگن تعلیمی و شغلی چېکلاولرنی آچیقچه قاره لشنی و خلق ارا همجمعیتدن «جنسیتي اپارتاید» نی بیر خلق ارا جنایت صفتیده رسمی تانیشنی سۉره دیلر.
آته سی نینگ دفتر رئیسی هم بولگن سعیده میرضیایف، بیرلشگن ملتلر تشکیلاتی ده گی نطقی ده، افغانستان گه فقط خوفسیزلیک نقطه ی نظریدن قره ش و بو مملکت نی تهدید منبعی دېب بیلیش ییچیم یۉلی اېمسلیگینی و افغانستان خلقی نی یالغیز تشلش معمالرنی کوپه یتیریشینی ایتگن اېدی. افغان عیال فعاللری عکس العملده، عیاللرنینگ سیستماتیک باستریلیشی بیر ایچکی مسئله اېمس، بلکه بوتون منطقه نینگ ثباتینی تهدید قیله دی و ژئوپلیتیک منفعتلر اوچون قربان قیلینمسلیگی کېره کلیگینی ایتدیلر.
منبع: افغان عیال فعاللری نینگ بیانیه سی
🌐
