په هرات کې د طالبانو ځايي چارواکو تایید کړې چې د دغه ولایت په ګذره ولسوالۍ کې په یوه غمجنه پېښه کې درې وروڼه خپل ژوند له لاسه ورکړی دی. دا پېښه د چهارشنبې په مازدیګر، د میزان په اتمه، د ګذرې ولسوالۍ په «نشین» سیمه کې هغه مهال رامنځته شوه چې دغه درې وروڼه د اوبو په یوه څاه کې د اکسیجن د کمښت او ساه بندۍ له امله مړه شول.
په هرات کې له پېښو سره د مبارزې لپاره د طالبانو د چمتووالي امر، قاري حذیفه، رسنیو ته وویل چې دغه درې وروڼه په کرنیزو کارونو بوخت وو او د اوبو را ایستلو لپاره څاه ته ننوتلي وو. د هغه په وینا، د دې څاه ژوروالی شاوخوا اته تر لسو مترو پورې و او درې واړه کسان وروسته له هغې چې ورننوتل، د ساه بندۍ سره مخ شول.
په ورته وخت کې، ځايي سرچینې د دې پېښې په اړه یو ډېر دردونکی روایت وړاندې کوي. د دغو سرچینو په وینا، په لومړي سر کې یو ورور د کوم کار لپاره څاه ته تللی و او د اکسیجن د کمښت له امله بند پاتې شوی و. وروسته، دوه نور وروڼه د هغه د ژغورلو لپاره یو په بل پسې څاه ته ننوتل او له بده مرغه، درې واړو په دې هڅه کې خپل ژوند له لاسه ورکړ.
دغو سرچینو زیاته کړه چې د دغو دریو وروڼو د جسدونو د را ایستلو عملیات تر نیمې شپې پورې روان وو او په پای کې د هغوی بې ژونده جسدونه له څاه څخه را وایستل شول. دې پېښې د سیمې د اوسیدونکو ترمنځ ژور غم راپارولی دی.
په څاګانو کې د ګاز نیونې او د اکسیجن د کمښت له امله ورته پېښو پخوا هم د افغانستان په بېلابېلو سیمو کې ډېر قربانیان اخیستي دي. کارپوهان وايي چې بې احتیاطي، په تړلو څاګانو کې د شته خطرونو په اړه د پوهاوي نشتوالی او د خوندیتوب اسانتیاوو او تجهیزاتو نشتوالی د داسې مرګونو پېښو د رامنځته کېدو اصلي لاملونه دي.
ځایي چارواکو له هیوادوالو غوښتي چې د څاګانو په شاوخوا او دننه کې د کار کولو پر مهال د خوندیتوب ټکي په کلکه مراعت کړي ترڅو د داسې غمیزو د تکرار مخه ونیول شي.
سرچینه: ځايي رسنۍ
🌐
