د روسیې د بهرنیو چارو وزیر، سرګي لاوروف، د سې شنبې په ورځ د میزان په ۱۴مه، د مسکو فارمټ د اتمې غونډې د پاییزې اعلامیې په نه صادرېدو په غبرګون کې، د طالبانو او پاکستان ترمنځ اختلافات "ناخوښه" وبلل.
د روسیې د بهرنیو چارو وزارت د ویبپاڼې له مخې، لاوروف وویل چې د اعلامیې له نه صادرېدو سره سره، باید له دې څخه تراژیدي جوړه نه شي، ځکه چې د دې ننګونو ریښې د وړاندوینې وړ وې. د هغه په وینا، د طالبانو او پاکستان ترمنځ جدي تاوتریخوالی د داعش ډلې او د هغې د څانګو د شتون له امله دی چې په دواړو هیوادونو کې بریدونه ترسره کوي.
د افغانستان لپاره د روسیې ځانګړي استازي، ضمیر کابلوف، مخکې ویلي وو چې غونډه د طالبانو او پاکستاني پلاوو ترمنځ د اختلاف له امله له ګډې اعلامیې پرته پای ته ورسېده. د هغه په وینا، طالبانو باور درلود چې د اعلامیې په متن کې د افغانستان نوم "د تروریزم په برخه کې له حده زیات" یاد شوی دی.
کابلوف زیاته کړه چې د طالبانو دا دریځ د مسکو لپاره د حیرانتیا وړ و، ځکه چې ورته عبارتونه د تېر کال په اعلامیه کې هم موجود وو، خو طالبانو استدلال وکړ چې وضعیت بدل شوی او دا موضوع نور ورته د منلو وړ نه ده.
لاوروف همدارنګه د داعش ډلې راڅرګندېدل پر عراق د امریکا له برید او د نویو تروریستي ډلو راڅرګندېدل په لیبیا کې د ناټو له مداخلې سره وتړل. هغه ډاډ څرګند کړ چې هم طالبان او هم پاکستان د اړیکو عادي کولو ته لیواله دي او مسکو له دې بهیر څخه ملاتړ کوي.
روسي چارواکو ټینګار وکړ چې دا پیښه به د مسکو فارمټ د کار مخه ونه نیسي او دا غونډه به خپلو فعالیتونو ته دوام ورکړي.
سرچینه: د روسیې د بهرنیو چارو وزارت
🌐
