ییگیرمه بېش ییل آلدین شو کونده، یعنی ۲۰۰۱ نچی ییل نینگ ییتینچی اکتوبریده، امریکا قۉشمه ایالتلری افغانستانده القاعده گه پناه بېرگن طالبان نینگ بیرینچی رژیمینی آغدریش اوچون هجوم باشله دی. تریلیونلب دالر هزینه قیلینگن و مقصدی طالبان و القاعده نی یۉق قیلیش بۉلگن بو اوروش، آخریده امریکا نینگ چیقیشی و طالبان نینگ قدرت گه قیتیشی بیلن یکونلندی.
امریکا طالبان حاکمیتی آستیده گی افغانستان گه هجوم قیلگن پیتده، تمنا رحیمی (مستعار اسم) ۱۰ یاشر قیز اېردی. او امریکا نی تَنیمَسدی. تمنا اوچون امریکا سۉزی فقط دادَه سی رادیودن اېشیتیب، افغانستان گه اونینگ احتمالی هجومی حقیده گپیرگن بیر اسم اېردی. تمنا اوچون «هجوم» نینگ معناسی انیق اېردی: قۉرقینچ، قاچیش و اوی نی ترک اېتیش؛ بو تجربه او و عایله سی اوچون افغانستان شمالیده گی اوروشلرده بیگانه اېمس اېردی.
تمنا دادَه سی نینگ کۉحنه رادیوسی یانیده، آنه سی حمیرا (مستعار اسم) دن هم مکتب باریش قصه لرینی اېشیتردی. لیکن اۉزی طالبان حاکمیتی ییللریده مکتب گه باریش امکانیتیگه اېگه بۉلمه دی. او پیتده گی خاتین قیزلر حیاتی حقیده هم اونینگ ذهنیده بعضی تصویرلر قالگن؛ خاتین قیزلر که اوی دن تشقری گه چیقیش گه اجازه لری یۉق اېردی.
او پیتده تمنا وضعیت نی تۉلیق چوشونمسده، بوگون او دور نی بیر سۉز بیلن توصیف ایتماقده: «فاجعه». اۉز سۉزیگه کۉره، بو فاجعه نی حاضر قیته دن تجربه قیلماقده. ایکّی دهه دن سۉنگ، طالبان نینگ قدرت گه قیتیشی بیلن او و میلیونلب باشقه افغان خاتین قیزلر ینه بیر بار اۉخشش چکلَولر بیلن روپه‌رو بۉلگن.
تمنا نینگ حکایه سی، خارجی کوچلر و ایچکی گروه لر آره سیده گی توختَمسدن دوام اېتگن اوروش و تینچلیک دایره سیده قالگن بیر نسل افغان نینگ تقدیرینی عکس اېتتیره دی. ایرکینلیک و دموکراسی وعده لری بیلن باشلنگن اوروش، نتیجه ده اونینگ آغدریلیشی اوچون کیلگن گروه نینگ قیته قدرت گه کیلیشی بیلن اَچّیق بیر شکلده سۉنگگیگه ییتدی.
حاضر بو واقعه نینگ ییگیرمه بېشینچی ییللیگیده، تمنا کبی کۉپلب افغان لر اۉتمیش گه قره ب، آلدیده گی نامعلوم کیله جک نی کۉرماقده. اولر اوروش نینگ اون ییللیک عذاب لر گه چک قۉییشینی اومید قیلگن اېردیلر، لیکن حاضر اۉزلرینی تاریخ ینه بیر بار تکرارلنه یاتگن بیر نقطه‌ده تاپماقده لر.
منبع: Zarin TV
🌐
