پر افغانستان د امریکا د پوځي یرغل له ۲۵مې کلیزې سره هم مهاله، د طالبانو حکومت دا ورځ وغندله. د طالبانو د ویاند مرستیال حمدالله فطرت په یوه پیغام کې دا پېښه "د افغانستان په تاریخ کې یوه توره ورځ" وبلله.
فطرت د چهارشنبې په ورځ د اکس په ټولنیزه شبکه کې په یوه پیغام کې ولیکل چې د امریکا د پوځي حضور په وړاندې د افغانانو مبارزې ثابته کړه چې د افغانستان خلک د هیڅ بهرني اشغال په وړاندې سر نه ټیټوي. هغه زیاته کړه چې د دې یرغل له امله پیل شوې شل کلنې جګړې زرګونه افغانان ووژل او د هېواد د ډېرو اتباعو د ټپي کېدو، زنداني کېدو او بې ځایه کېدو لامل شوه.
د طالبانو د ویاند مرستیال وویل چې دې ډلې د بهرنیو ځواکونو د دوه لسیزو حضور په اوږدو کې، د هغه څه په وړاندې چې هغه "اشغال" وباله، مقاومت وکړ او په پای کې وتوانېدل چې دې پوځي حضور ته پای ورکړي.
هغه همداراز خبرداری ورکړ چې هر هېواد چې په راتلونکي کې د افغانستان د اشغال هوډ ولري، د "افغان ولس له مقاومت او مبارزې" سره به مخ شي. د فطرت په وینا، افغانان بهرنۍ مداخلې او اشغال ته نه تسلیمېږي او د خپل هېواد له خپلواکۍ څخه به دفاع وکړي.
د امریکا متحده ایالاتو د ۲۰۰۱ کال د اوکټوبر په اوومه، د سپټمبر د ۱۱مې له بریدونو وروسته، په افغانستان کې د طالبانو او القاعده شبکې پر ضد خپل پوځي عملیات پیل کړل. د طالبانو لومړی رژیم له دې برید څخه څو اونۍ وروسته نسکور شو، خو د دې ډلې او د امریکا او متحدینو د ځواکونو ترمنځ جګړه نږدې دوه لسیزې روانه وه او د ۲۰۲۱ کال د اګست په ۳۰مه د امریکايي ځواکونو په بشپړ وتلو سره پای ته ورسېده.
سرچینه: Zarin TV
🌐
