د امریکا مرستیال ولسمشر، جې ډي ونس، د نضال حسن د اعدام د ژوندۍ خپرولو د جنجالي پلان په غبرګون کې ویلي، چې لا هم دا خبره یقیني نه ده چې داسې کار به وشي او که دا مراسم خپاره شي، دی به یې په خپله ونه ګوري.
ونس د جمعې په ورځ، د تلې په ۱۷مه، خبریالانو ته وویل: "ما دا راپورونه لیدلي، خو نه پوهیږم چې داسې کار به وشي که نه." دا څرګندونې وروسته له هغه وشوې چې د امریکا د جګړې وزیر، پیټ هیګست، یوه ورځ مخکې ویلي وو چې خلک به د نضال حسن د تیرباران مراسم وګوري.
د امریکا د پوځ پخوانی رواني ډاکټر، نضال حسن، په ۱۳۸۸ (۲۰۰۹) کال کې د ټګزاس ایالت په فورټ هوډ پوځي اډه کې د ۱۳ کسانو د وژلو او ۳۲ نورو د ټپي کولو په جرم په اعدام محکوم شوی دی. ټاکل شوې چې د هغه اعدام د تیرباران له لارې ترسره شي.
د دې پوځي اعدام د ژوندۍ خپرولو پلان له پراخو نیوکو سره مخ شوی، ان د ځینو جمهوري غوښتونکو له خوا هم. د لویزیانا ایالت جمهوري غوښتونکي سناتور جان کینډي ویلي چې دی د دې اعدام له خپرولو سره مخالف دی او که پرېکړه د ده په لاس کې وای، نو دا کار به یې نه کاوه. هغه استدلال وکړ چې دا ډول عمل به ټولنه نوره هم تاوتریخوالي کړي.
د یوتا ایالت جمهوري غوښتونکي سناتور جان کورټیس هم د اکس په ټولنیزه شبکه کې د جګړې له وزیر څخه وغوښتل چې په دې پرېکړه له سره غور وکړي. ډېرو دیموکراتانو هم دا پلان په کلکه غندلی دی.
د دې پلان ملاتړي ښايي استدلال وکړي چې د اعدام عامه خپرول د ورته جرمونو لپاره د مخنیوي عامل په توګه کار کولی شي او د قربانیانو کورنیو ته به د زړه تسل ورکړي. خو مخالفین یې پر ټولنه د منفي رواني او ټولنیزو اغېزو او په معاصر امریکايي تاریخ کې د هغې پر بې ساري توب ټینګار کوي.
په امریکا کې په ډزو سره وروستی پوځي اعدام په ۱۳۲۳ (۱۹۴۴) کال کې ترسره شوی و. په هغه وخت کې، د پوځ یو سرتېری، ایډي سلوویک، د دویمې نړیوالې جګړې پر مهال له خدمت څخه د تېښتې په جرم تیرباران شوی و.
سرچینه: خبري راپورونه
🌐
