بغلان والی سی عبدالله مختار، بیر فرهنگی حرکتده اوشبو ولایت نینگ اطلاعات و فرهنگ ریاست عمومی کتابخانه سیگه ۱۲۰۰ جلد کتاب هدیه قیلدی. بغلان ولایتی مقامی نینگ خبرنامه سیده ایتیلیشیچه، بو کتابلر تورلی علمی، ادبی، تاریخی، سیاسی و فرهنگی موضوع لرنی اۉز ایچیگه آله دی.
خبرنامه گه اساساً، بو اقدامدن مقصد، بغلان ولایتیده گی یشاوچیلر اوچون مطالعه منبع لرینی بایلشتیریش و یاشلر و جامعه نینگ باشقه قتلملری آره سیده کتابخوانلیک فرهنگی نی رواجلنتیریش دیب اتیلگن. بغلان والی سی جامعه نینگ آگاهلیک سویه سینی کوتریش یولیده مطالعه نینگ اهمیتیگه تاکیدله گن.
بغلان عمومی کتابخانه سی اوشبو ولایتده گی مهم فرهنگی مرکز لردن بیری سنله دی که هر کونی اونلب کتاب و مطالعه گه علاقه مند کیشی نی میزبانلیک قیله دی. بو کتابخانه اۉز مراجعه چیلریگه ینگی و تورلی منبع لرگه ایریشیشنی فراهم قیلیش اوچون سعی و حرکت قیلماقده.
محلی رسمیلرنینگ ایتیشیچه، بغلان ولایتی نینگ مرکزی پلخمری شهریگه قۉшимچه، اوشبو ولایت نینگ باشقه بیش ولسوالی سیده هم عمومی کتابخانه نینگ شعبه لری فعال دیر. بو ایش ولسوالی لر یشاوچیلری نینگ کتاب و معلوماتی منبع لرگه ایریشیشینی آسانلشتیره دی.
بغلان والی سی نینگ بو اقدامی اوشبو ولایت نینگ فرهنگیلری و یاشلری تامانیدن خوش قرشی آلینگن. اولر بونده‌ی حرکتلر جامعه نینگ فکری رواجلنیشیگه یاردەم بیریشی و یاش نسل نی علم و بیلیم کسب ایتیش گه تشویق قیلیشیدن امیدوار دیرلر.
ینگی کتابلر و مطالعه مواد نینگ کمچیلیگی، افغانستان نینگ کوپلب ولایتلریده گی عمومی کتابخانه لر آلدیده گی اینگ کتته معما لردن بیری دیر. بو فرهنگی مرکز لردن محلی رسمیلر و یشاوچیلر نینگ حمایه سی، بو معما لرنی حل قیلیش و مملکتده مطالعه فرهنگی نی کوچه‌یتیریشده مهم بیر رول اۉینه شی ممکن.
منبع: بغلان ولایت مقامی نینگ خبرنامه سی
🌐
