آلمان ده گی رسمی آمار لر گه کۉره ۲۰۱۲ نچی ییل دن بېری مملکت نینگ بادن-وورتمبرگ ولایتیده باله لر نکاحی نینگ ۳۵۸ موردی ثبت ایتیلگن، لیکن اولردن فقط سککیز ته سی محکمه نینگ قطعی حکمی بیلن بیریلیب یوباریلگن. آلمان نینگ ولت روزنامه سی معلوماتیگه کۉره، بو دوسیه لر آره سیده ۱۱ و ۱۲ یاشر قیزلرنینگ نکاح لری هم بار.
دوشنبه کونی ۱۲ اکتوبر ده نشر ایتیلگن بو گزارش ده کوپینچه بو نکاح لر مهاجر عایله لر آره سیده یوز بیرگن لیگی بیلدیریلگن. بو نکاح لرنینگ کوپی آلمان دن تشقریده عملگه آشیریلگن و عایله لر بو مملکت گه مهاجرت قیلگندن سۉنگ، موجود حقوقی بیر حقیقت صفتیده ثبت ایتیلگن.
ذکر ایتیلگن دوسیه لر آره سیده بیر نیچه مورد افغان قیزلر گه تیگیشلی دیر. مثال اوچون، ۲۰۲۰ نچی ییلده ۱۲ یاشر بیر افغان قیز نینگ ۱۸ یاشر بیر ایرکک بیلن نکاحی ثبت ایتیلگن و ۲۰۲۳ نچی ییلده ایسه باشقه بیر ۱۲ یاشر افغان قیز نینگ ۲۱ یاشر بیر افغان ایرکک بیلن نکاحی ثبت بۉلگن. شونینگدیک ۲۰۱۸ نچی ییلده، ۳۰ یاشر بیر ایرکک بیلن ۱۴ یاشر بیر افغان قیز نینگ نکاحی محکمه تامانیدن لغو قیلینگن.
باشقه مورد لر عراق لیک ۱۱ یاشر بیر قیز نینگ ۱۷ یاشر بیر ییگیت بیلن ۲۰۲۰ نچی ییلده نکاحی نینگ لغو ایتیلیشی نی اۉز ایچیگه آله دی. ۲۰۲۴ نچی ییلده ایکّی باشقه نکاح هم لغو قیلینگن که، بیری ۱۶ یاشر آلمان لیک قیز بیلن ۲۵ یاشر پاکستان لیک ایرکک و ایکّینچیسی ۱۶ یاشر سوریه لیک قیز بیلن ۲۷ یاشر سوریه لیک ایرکک گه تیگیشلی ایدی. شونینگدیک، ۲۰۲۲ نچی ییلده ۲۸ یاشر بیر ایرکک بیلن ۱۲ یاشر سوریه لیک بیر قیز نینگ نکاحی گزارش قیلینگن.
آلمان قانون لری ۱۶ یاشدن کیچیک لرنینگ نکاحی نی بوتونلی منع قیلگن و ۱۶ بیلن ۱۸ یاش آره سیده گی نکاح محکمه نینگ مخصوص رخصتی گه احتیاج سیزه دی. شونگه قره مسدن، باشقه مملکت لرده قانونی شکلده ثبت ایتیلگن نکاح لرنی لغو قیلیش، مورکب بیر حقوقی جریان دیر و بو لغو ایتیلگن نکاح لرنینگ سانی نینگ آزلیگینی ایضاحله یدی.
آلمان ده گی مصلحت مرکز لری بو ساحه ده آرتگن قیینچیلیک لر بیلن روپه ره دیر. «یاسمین» مصلحت مرکزی اۉز گزارشی ده ۲۰۲۵ نچی ییلده ۲۷۱ دوسیه نی کۉриб چیققن لیگینی اعلان قیلگن. بو دوسیه لرنینگ ۸۰ موردی ده، کیши لر مجبوراً نکاح له نیش خطری بیلن یوزمه یوز بۉلگنلر و اولردن ۳۳ ته سی قانونی یاش گه تولمه گن دیر.
منبع: ولت روزنامه سی
🌐
