بیر قطار افغان باغدار لر، پاکستان بیلن تجارت نینگ توخته تیلیشی کابل بازار لریده اوزوم قیمتی نینگ ۷۰ فایزدن کۉپراق کمه ییشیگه سبب بولگنینی ایته دیلر. اولرنینگ ایتیشیچه، بو وضعیت کشاورز لرگه آغیر زیان ییتکیزگن و طالبان حکومتی نی آلترناتیف بازار لر تاپیشده دقت سیزلیک بیلن متهم قیله دیلر.
بو باغدار لر افغانستان اینترنشنل بیلن مصاحبه ده، اوتگن ییل هر خروار (عنعنوی آغیرلیک بیرلیگی) کشمشی اوزومنی ۱۵ مینگ افغانیگه ساتگن لرینی، لیکن بو ییل بو قیمت ۴ مینگ افغانیگه توشگنینی ایتدیلر. شنگل خانی اوزومی نینگ قیمتی هم ۳۰ مینگدن ۸ الی ۱۰ مینگ افغانیگه کمه یگن.
کشاورز لر طالبان حکومتی نی اورته آسیا و باشقه مملکت لرگه اوزوم و آلما صادر قیلیش اوچون حرکت قیلمه گن لیگیدن تنقید قیله دیلر. اولر شونینگدیک طالبان اداره سیگه تۉله یاتگن آغیر هزینه لر و ترانسپورتی چیکلاو لردن شکایت قیله دیلر. طالبان یۉلاوچی تاشووچی بس لر بیلن میوه انتقالینی منع قیلگن و باغدار لر یول تاشووچی موتر لردن فایده لنیشگه مجبورلر که بو کیچه ده گی تردد چیکلاو لری سببلی، محصولات نینگ بوزیلیشیگه سبب بوله دی.
بیر کشاورز، طالبان نینگ کابل کیریش دروازه سیده و میوه مارکیتیده هر موتردن پول آلیشینی ایتدی. او قۉشیمچه قیلدی: «بو ییل باغ اوچون قیلگن مصرف لریمیز و طالبانگه تۉله گن هزینه لریمیز، اوزوم ساتیلیشیدن قولگه کیلگن پولدن کۉپراق اېدی.»
پاکستان اوتگن ییل نینگ ۲۰ میزانیده طالبان بیلن چېگره ده گی توقنه شوو لردن سۉنگ اۉز گذرگاه لرینی یاپدی. بیر تحقیقی گزارش اساسیده، بو اقدام ایکی مملکتدن ۲.۳ میلیارد دالر تجارتی فرصتنی آلگن. هرچند افغانستان نینگ وارداتی ایران و اورته آسیا یۉل لریدن جایگزین بولگن، لیکن زراعتی محصولات نینگ صادراتی شدید شکلده زیان کۉرگن.
باغدار لر، باشقه محصولات مثال اوچون تربوز جنوبدن اورته آسیاگه صادر بولگن حالده، کابل نینگ شمالیده گی اوزوم و آلما صادراتی اوچون هیچ قندای قرارداد امضالنمه گنینی و بو ایش اولرگه کتته زیان ییتکیزگنینی ایته دیلر.
منبع: Afghanistan International
🌐
